Impaka zambere zitoroshye zahuje abashaka kuyobora Amerika, Perezida Trump na Joe Biden, Biden yarakaye cyane asaba Trump gufunga umunwa

Nizo mpaka za mbere aba bagabo bombi bari bagiraniye mu ruhame,imbere y’ibinyamakuru bikomeye. Izi mpaka zahuje Perezida Trump na Joe Biden wifuza kuzamusimbura zaranzwe no kutoroherana kuko Trump yacaga mu ijambo Biden, nawe aza kurakara aramubwira ati: “ Watubabarira ugaceceka!”

Uyu aherutse kugirana ikiganiro kihariye na Donald Trump, akaba yaramubajije icyo azakora naramuka atsinzwe amatora y’Umukuru w’igihugu, undi amusubiza ko ‘bizaterwa n’ikizaba gihari.’

Zabaye mu ijoro ryakeye zibera Cleveland, muri Leta ya Ohio, USA.

Umunyamakuru w’icyamamare cyane muri USA n’ahandi witwa Chris Wallace niwe wari umuhuza w’amagambo.

Izi mpaka zahuje Perezida Trump na Joe Biden wifuza kuzamusimbura zaranzwe no kutoroherana kuko Trump yacaga mu ijambo Biden

Mu minota ya mbere y’ikiganiro Perezida Trump yacaga mu ijambo Biden, ibi akabikora mu rwego rwo kumuhungabanya mu bitekerezo.

Byageze ubwo Joe Biden arakara, amusaba guceceka!

Icyo gihe yari kuvuga ku byerekeye uko Donald Trump yagiye arobanura abantu bakemangwa akabashinga kuyobora Urukiko rw’Ikirenga rwa USA.

Nyuma y’iminota 15, ubwo bavugaga kuri COVID-19, Trump yongeye aca mu ijambo Biden, nawe aramutwama amusaba guceceka.

Kubera ko Perezida Trump yacaga mu ijambo Biden inshuro nyinshi, umusangiza w’amagambo, umunyamakuru wa Fox News Bwana Chris Wallace yageze aho asaba Trump guha agahenge Biden akarangiza kuvuga icyo atekereza.

Wallace ati: “ Ni njye musangiza w’amagambo muri izi mpaka, bityo rero ndabasaba mwese ko buri wese yajya areka nkabaza mugenzi kandi akansubiza ntawe umurogoye.”

Bidatinze Perezida Trump yaje kubwira Wallace ati: “ Biragaragara ko ndi kujya impaka nawe aho kuzijya na Biden. Ariko nta gitangaje kurimo.”

Izi mpaka zamaze iminota 90 zagaragaje ko izindi ziri imbere zizaba ziryaye kurushaho.

Bibanze ku ngingo zaranze ubutegetsi bwa Trump zirimo abo yasabiye kuyobora Urukiko rw’ikirenga bakananirwa, uko yitwaye mu guhashya COVID-19,  ibye n’umuhngu wa Biden witwa Hunter Biden, ndetse n’uburyo akemura ikibazo cy’abapolisi barasa Abirabura ku bwende.

Ikindi kandi cyagarutsweho na Chris Wallace ni iby’uko Perezida Donald Trump yahishe ibirarane by’imisoro afitiye ikigega cya Leta ndetse yasabwe kuvuga igihe azabitangariza Abanyamerika, araruca ararumira!

The New York Times iherutse gutangaza ko muri 2016 ubwo yiyamamarizaga kandi agatorerwa kuyobora USA, yishyuye $750 gusa mu misoro yose yari abereyemo ikigega cya Leta zunze ubumwe z’Amerika.

Trump yabwiye Chris Wallace ko muri 2016 yishyuye imisoro ingana na miliyoni 38$, umwaka ukurikiyeho yishyura miliyoni 27$.

Joe Biden yahise amubwira ati: “ Niba ibyo uvuga ari ukuri, twereke aho byanditse, inyandiko zirekana ko wasoreye Leta.”

Trump ati: “ Uzazibona buretse haracyari kare!”

Biden yabwiye abari aho ko Donald Trump adasora nk’abandi Banyamerika kandi nawe iri tegeko rimureba, avuga ko Trump asora umusoro muto kurusha uwa mwarimu.

Trump yaje kwemera ko hari imisoro atasoze…

Nyuma yo kotswa igitutu kubera ibibazo bya Wallace, Perezida Trump yaje kwemera ko hari imisoro atasoze, kandi ko ibyo ari ‘ibintu bisanzwe bikorwa na ba rwiyemezamirimo basobanutse’

Ati: “ Mbere y’uko mba Perezida nari umucuruzi wikorera, kandi hari imisoro ntasoze. Ibi ariko si umwihariko wanjye kuko n’ahandi hose ba rwiyemezamirimo batari ibicucu bakwepa imisoro.”

Ku ngingo y’uko Abazungu bo muri USA bumva ko aribo baruta abandi baturage bayo, Trump yasubije ko ibyo ari ibisanzwe kandi ko abantu bagomba kubyitega ariko akavuga ko we icyo yifuriza Abanyamerika ari amahoro asesuye.

Ibi ariko ntibyabujije Biden kuvuga ko Trump avangura abantu ashingiye ku ruhu ndetse ko ashishikariza abantu kwanga USA kandi asuzugura abaturage ashinzwe kwitaho.

Impaka z’aba bagabo zari ndende kuko zavuze no ku mubano wa USA n’u Bushinwa muri Manda ya Trump, ku ngingo y’uko aherutse gutuka ingabo za USA kandi azibereye Umugaba w’Ikirenga n’ibindi.

Tanga Igitekerezo ukoresheje Facebook

SHARE