Impamvu Muhadjili yateye umugongo ikipe ya Rayon agasinyira ikipe ya AS Kigali

Nyuma yo gusinyira AS Kigali, rutahizamu uri mu bakomeye mu Rwanda Hakizimana Muhadjili  avuga ko icyatumye atera umugongo Rayon Sports ari uko ‘yamuhaye chèque mu magambo gusa’, igahora imwizeza ko amafaranga ari hafi kuyabona bityo asanga ari ukumuzirika ku katsi.

Avuga ko hari ibyo yari yaremeranyijwe na Rayon Sports birimo n’amafaranga yagombaga guhabwa haba mu kumugura ndetse n’ayo yari buhembwe ku kwezi, ariko ngo byari amagambo gusa.

Ati: “Ibyo byose ni ibintu twavuganye na Rayon Sports ariko sinashoboraga gukomeza gutereza ibintu mpora mbwirwa mu magambo gusa kandi ntazi gahunda z’Imana. Nta mafaranga ya Rayon nafashe, niyo mpamvu nsinyiye AS Kigali ku mugaragaro.”

Avuga ko mu by’ukuri nawe yifuzaga gukinira Rayon Sports nk’ikipe ikundwa cyane mu Rwanda ariko acibwa intege n’ikizere yahabwaga n’ubuyobozi bwayo ariko akabona kizaraza amasinde.

Yiseguye ku bafana ba Rayon, avuga ko mu by’ukuri ayikunda ariko nanone akeneye agafaranga kandi kabangutse, katazarira…

Umuyobozi wa AS Kigali, Bwana Shema Fabrice avuga ko gutangira ‘kurambagiza’ Muhdjili bitatwaye igihe kinini, ngo ntibyarengeje icyumweru kimwe.

Ati: “ Nta nkuru irara, iyo iraye iba amateka. Niyo mpamvu natwe twasinyishije Muhadjili bikiri mu maguru mashya, ntabyo kuzarira.”

N’ubwo Shema yirinze kuvuga amafaranga baguze uriya rutahizamu, dufite amakuru twizeye avuga ko yaguzwe Miliyoni Frw 15 ku mwaka, akazajya ahembwa Frw 1.200. 000 ku kwezi

Amasezerano ye avuga kandi ko hari indi kipe imushaka ikamuha ibiri hejuru yibyo AS Kigali yamuhaye,  ko AS Kigali yasubizwa amafaranga yamuguze akagenda.

Igenda rya Muhadjili ryababaje aba Rayon benshi harimo na  Muhirwa Fred.

Tanga Igitekerezo ukoresheje Facebook

SHARE