Umuhanzi Diamond Platnumz yemeje ko agiye kurongora umunyamakurukazi wo muri Kenya, Tanasha Oketch kuko ngo ariwe mukobwa wakiriye neza icyifuzo cy’uko bashyingiranwa bitandukanye n’abandi bose yakundanye nabo harimo nabo babyaranye.

Mu minsi ishize nibwo byamenyekanye ko Diamond amaze igihe acuditse mu ibanga na Tanasha Donna Oketch usanzswe ari umunyamakuru kuri NRG Radio yo muri Kenya ndetse akaba anifashishwa mu mashusho y’indirimbo z’ibyamamare bitandukanye.

Mu kiganiro uyu muhanzi yakoranye na Ijumaa Newspaper, yahishuye ko mu bakobwa bose bakundanye harimo na babiri babyaranye (Zari na Mobetto) batigeze bakira neza icyifuzo cye cy’uko barushingana nawe. Iyi ngo akaba ariyo mpamvu nyamukuru yatumye yegurira umutima we Tanasha kuko we yabyemeye ntakuzuyaza.

Diamond yagize ati “Tanasha ni we mukobwa wenyine wanyeretse ko umubano wacu ufite gahunda. Kubera uko ari umwizerwa mboneyeho kuvuga ku mugaragaro ko ariwe rukumbi nzashyingiranwa nawe.”

Uyu muhanzi yakomeje avuga ko Tanasha afite byose yahoze arota ku mugore bazarushinga.

Ati “Murabizi ko buri mugabo aba ashaka umugore ukurura abantu, uteye neza ndetse unafite ibindi byinshi byiza ku mubiri we. Nyuma yo kubona ibyo byose kuri Tanasha, naranyuzwe birenze urugero. Nta mugore n’umwe mu buzima bwanjye yaba ubw’ahahise n’ubwo ndimo uyu munsi, wigeze agira ubwiza bukabije n’imyitwarire nk’ibyo nabonanye Tanasha, unateye neza nka we.”

Muri izi mpera z’icyumweru dusoje ubwo Diamond yari yagiye gukorera igitaramo muri Kenya ahitwa Thika, uyu mukunzi we Tanasha yagaragaye yaje ku mwakira ku kibuga cy’indege bahita banakomezanya mu modoka.

Tanasha Donna Oketch afite imyaka 22 y’amavuko, avuka kuri se ukomoka mu Butaliyani na nyina w’Umunyakenya. Hari andi makuru avuga ko uyu mukobwa yamaze kwerekana Diamond mu muryango ndetse ubukwe bwabo bukaba buteganyijwe mu ntangiriro z’umwaka utaha wa 2019.

Tanasha Oketch umunyamakurukazi ugiye kurushinga na Diamond Platnumz

Tanasha ari mu banyamakuru bakunzwe cyane muri Kenya

Diamond yemeza ko uyu mukobwa ateye neza kurusha abandi bose yakundanye nabo




Ubwo Diamond aheruka muri Kenya uyu mukobwa niwe waje kumwakira ku kibuga cy’indege

Leave A Comment

Ntugire ikibazo Email yawe ntabwo tuyigaragaza kurubuga (*).