Iradukunda Liliane uhagarariye u Rwanda mu marushanwa yo gutoranya umukobwa uhiga abandi ku isi, yashyizwe mu bakobwa 25 bafite ubwiza bufite intego.

Liliane, witabiriye irushanwa ry’ubwiza Miss World 2018 akomeje kwitwara neza muri iri rushanwa risigaje iminsi mike ngo risozwe.

Iri rushanwa ryatangiye ku wa 9 Ugushyingo 2018, mu gihe uzegukana irushanwa azamenyekana ku wa 8 Ukuboza 2018.

Mubyo aba bakobwa bakora, harimo kwerekana impano, kugaragaza ubumenyi bifitemo, kwigaragaza mu mitambukire n’imivugire nibindi ibi akaba ari nabyo bizatanga amanota kuzegukana iri kamba bari guhatanira.

Iradukunda yashyizwe mu bakobwa 25 bafite ubwiza bufite intego nyuma yo kwerekana umushinga wo kurwanya imirire mibi, ugashimwa n’abagize akanama katangaga amanota.

Muri iki cyiciro cy’ubwiza bufite intego, umukobwa wo muri Nepal witwa Shrinkhala Khatiwada ufite umushinga wo kubaka ibigo nderabuzima mu bice by’icyaro niwe wabaye uwa mbere.

Abakobwa baje imbere ni uwo muri Barbados, Brazil, Chile, u Bushinwa, Cook Islands, Guyana, Indonesia, u Butaliyani, Jamaica, u BUyapani, Kenya, Lebanon, Malaysia, Mexico, Mongolia, Myanmar, Nepal, New Zealand, Panama, u Burusiya, u Rwanda, Ecosse, Singapore, Trinidad & Tabago na Vietnam.

U Rwanda rumaze kwitabira iri rushanwa rya Miss World inshuro eshatu ; mu 2016 hagiyeho Mutesi Jolly, 2017 hajyayo Iradukunda Elsa na Iradukunda Liliane waserukiye igihugu uyu mwaka.

Ubwo Mutesi Jolly yitabiraga nawe yaje mu bakobwa 24 bafite ubwiza bufite intego na Iradukunda Elsa ubwo yitabiraga aza muri batanu berekanye imico yabo neza muri Afurika.

Iri rushanwa riri kuba ku nshuro ya 68 ahitwa Sanya mu Ntara ya Hainan mu Bushinwa, ryitabiriwe n’abakobwa 122.

Umuhindekazi Manushi Chhillar w’imyaka 21 niwe wegukanye iri kamba umwaka ushize.

Leave A Comment

Ntugire ikibazo Email yawe ntabwo tuyigaragaza kurubuga (*).