Umunyamuziki Mbilia Bel ufatwa nk’umwamikazi w’injyana ya Rumba, aritegura gutaramira Abanyarwanda kuri uyu wa Gatanu muri Kigali Jazz Junction afatanyije na Mike Kayihura. Aba bombi babwiye itangazamakuru ko biteguye gususurutsa byimazeyo abazitabira iki gitaramo.

Mu kiganiro n’itangazamakuru cyabereye muri Serena Hotel kuri uyu wa Gatatu kuya 5 Ukuboza 2018, Mbilia Bel wamenyekanye cyane mu ndirimbo nka ‘Nakei Nairobi’, ‘Nadina’ , ‘Eswi Yo Wapi’ n’izindi nyinshi, yavuze ko nubwo imyaka imaze kuba myinshi ariko akiri wawundi uzi kuririmba no kubyina bidasanzwe, asaba abakunzi be kuzaza ari benshi.

Yagize ati "Abanyarwanda bitege ibintu bikomeye, ndacyari wa wundi bakunze. Nubwo nkuze ubu, ijwi ndacyarifite. Ni rya rindi, imbyino nazo ntaho zagiye."

Uyu muhanzi wahishuye ko yaherukaga mu Rwanda mu myaka irenga 20 ishize, yabajijwe n’umunyamakuru icyo yasaba Perezida Paul Kagame agize amahirwe yo guhura nawe maze avuga ko yamusaba ko ubumwe hagati y’u Rwanda na Congo (igihugu cye cy’amavuko) bwarushaho kuganza ingoma ibihumbi n’ibihumbi.

Mike Kayihura uzafatanya na Mbilia Bel muri iki gitaramo, yabwiye itangazamakuru ko ari ibyagaciro kuri we kuba agiye guhurira ku rubyiniro n’uyu muhanzikazi yakuze yumva ko ari umunyabigwi muri muzika.

Akomeza avuga ko nubwo amaze igihe akora umuziki izina rye rikaba ritazwi na benshi uyu ari umwanya wo gutangira kwerekana inganzo ye no gushimangira ubuhanga bwe mu muziki. Yizeza abazitabira Kigali Jazz Junction kuzabataramira bakanyurwa.

Kigali Jazz Junction n’ibitaramo ngaruka kwezi bimaze kwigarurira imitima ya benshi mu bakunzi ba muzika y’umwimerere muri uyu mujyi.

Iki kizaba kuri uyu wa Gatanu tariki ya 7 Ukuboza 2018 nicyo cyanyuma muri uyu mwaka, kikazabera mu mahema ya Camp Kigali (KCEV) aho kubera muri Serena nkuko byari byamamajwe mbere.

Kwinjira bikazaba ari 10,000Frw mu myanya isanzwe na 20,000 mu myanya y’icyubahiro hakaba n’imeza ya VIP y’abantu 8 ku 160,000Frw. Ushobora kugura itike unyuze kuri www.rgtickets.com.


Uhereye ibumoso ni uwari uhagarariye Infinix, Mike Kayihura, Mbilia Bel, Remy umuyobozi wa RG Consult itegura ibi bitaramo n’uwari uhagarariye Mutzing itera inkunga Jazz Junction.


Mbilia Bel ngo nubwo imyaka imaze kuba myinshi aracyashoboye gushimisha abakunzi be nka cyera.


Mike Kayihura ngo n’amahirwe akomeye n’umwanya abonye wo kwigaragaza


Iki kiganiro cyari cyitabiriwe n’abanyamakuru batandukanye


Bafashe ifoto y’urwibutso

Leave A Comment

Ntugire ikibazo Email yawe ntabwo tuyigaragaza kurubuga (*).