Mu ijoro ryo kuri uyu wa Kabiri tariki ya 1 Mutarama 2019 nibwo mu mujyi wa Kigali habereye igitaramo cya East African Party cyabaga ku nshuro ya 11. Umuhanzi Meddy afatanyiije na Buravan, Bruce Melody, Riderman na Social Mula baririmbye muri iki gitaramo bashimishije abakunzi babo ku buryo bukomeye batangira 2019 mu buryohe bwa muzika yumwimerere.

Iki gitaramo kimaze kumenyerwa ko aricyo kibimburira ibindi bizaba mu mwaka wose, gitegurwa na East African Promoters (EAP). Kuri iyi nshuro Ngabo Medard wamamaye nka Meddy umaze imyaka isaga icyenda aba muri Amerika niwe wari umuhanzi w’Imena.

Iki gitaramo cyabereye muri Parikingi ya Sitade Amahoro cyari umwihariko kuko
Cyacuranzemo aba-Dj bane barimo Dj Phil Peter, Dj Lenzo, Dj Marnaud n’Abashyushya rugamba (MC) batanu aribo MC Anita Pendo, MC Tino, MC Kate Gustave, MC Buryohe na Mc Sylivie.

Ahagana ku isaha ya saa moya na 40 z’ijoro nibwo Social Mula yageze ku rubyiniro ari nawe wabimburiye abandi yanzika mu ndirimbo ze eshanu ahereye kuyo yise Abanyakigali, Amahitamo, Kundunduro, Humura, Ma vie asoreza kuri ‘Superstar’.

Bruce Melody niwe wahise akurikira ku rubyiniro maze nawe yongera kwereka abakunzi be ko umuziki w’umwimerere (live) ari ibintu bye. Riderman yahise akurikiraho maze nawe ashimisha abakunzi be mu ndirimbo ze zitandukanye ahereye kuyo yise Ikinyarwanda yakoranye na Bruce Melody.

Yvan Buravan uherutse kumurika album ye ya mbere yise ‘The love Lab’ niwe wabanjirije Meddy ku rubyiniro maze yongera kwerekwa urukundo rukomeye n’abakunzi ba muzika ye biganjemo abigitsina gore.

Ku isaha ya saa yine na 50 z’ijoro nibwo Meddy yahamagawe ku rubyiniro maze ibintu bihindura bihindura isura, bamwakiriza amashyi n’induru bigaragaza ko bari banyotewe kumubona abataramira. Abari inyuma babyigana begera imbere bashaka kumureba neza.

Meddy yahereye ku ndirimbo yise “Mubwire”, yateye yikirizwa na benshi bayikunze mu bihe byo hambere kugeza n’ubu. Asoje kuririmba ‘Mubwire’ yasuhuje abari muri iki gitaramo ababwira ko yari abakumbuye ubundi akomereza ku zindi ndirimbo ze zitandukanye.

Ubwo uyu muhanzi yaririmbaga indirimbo yise ‘Ntawamusimbura’ yahise ahamagara umukunzi we ku rubyiniro maze amumurikira abari aho ati “mwamubonye” aramuhobera ubundi asubira mu rwambariro.

Meddy waririmbye igihe cy’isaha irenga, yafashwaga n’itsinda ry’ababyinnyi n’abacuranzi bamufashije gushimisha abakuniz be bari bitabiriye iki gitaramo ku bwinshi.

Tanga igitekerezo

Ntugire ikibazo Email yawe ntabwo tuyigaragaza kurubuga (*).

Ibitekerezo(0)