Kuri iki Cyumweru tariki ya 7 Mata 2019 Isi yose yifatanyije n’u Rwanda mu kwibuka ku nshuro ya 25 Jenoside yakorewe Abatutsi.

Nk’uko biteganyijwe mu bikorwa byo kwibuka ku nshuro ya 25 Jenoside yakorewe Abatutsi, Perezida wa Repubulika y’u Rwanda Paul Kagame ari kumwe na Madame, afatanyije na Perezida wa Komisiyo y’umuryango wa Afurika yunze Ubumwe, Moussa Faki Mahamat, n’abandi banyacyubahiro ba banje gucana urumuri rw’ikizere ku rwibutso rwa Jenoside rwa Kigali.

Uru rumuri ruzaka mu gihe cy’iminsi ijana, gihwanye n’iminsi igihugu kizamara cyibuka Jenoside yakorewe Abatutsi.

Abasore n’inkumi bafite imyaka 25 ni bo bazanye urumuri baruha abanyacyubahiro, mu rwego rwo kugaragaza ko igihugu gifite amateka mashya yatangiye kubakwa ubwo Jenoside yahagarikwaga.

Ni nyuma yo gushyira indabo ku Rwibutso rushyinguyemo abarenga ibihumbi 250.

Bamwe mu banyacyubahiro baje kwifatanya n’Abanyarwanda harimo Perezida Congo Brazzaville, Perezida wa Niger, Perezida wa Djibouti, Minisitiri w’intebe wa Ethiopia, Minisitiri w’Intebe w’Ububiligi, Umunyamabanga mukuru w’umuryango w’ibihugu bivuga Igifaransa, Umunyamabanga mukuru wa Commonwealth, abahoze bayobora ibihugu bya Nigeria na Tanzania, Guverineri Generali wa Canada n’abandi.

Nyuma yo gucana urumuri no kwunamira inzirakarengane zazize Jenoside, imihango ikomereje muri Kigali Convention Center.

Tanga igitekerezo

Ntugire ikibazo Email yawe ntabwo tuyigaragaza kurubuga (*).

Ibitekerezo(0)