Umuhanzi Diamond Platnumz na Tanasha Donna bagombaga kuzarushinga ku itariki ya 14 Gashyantare 2019 nk’uko bari babitangaje, mu minsi ishize baje guhindura iyi tariki kubera impamvu zirimo no kutumvikana ku idini. Kugeza ubu buri wese yabaye ibamba ntawemera guhindura ngo ubukwe butahe.

Itariki ya 14 Gashyantare ni umunsi abatuye Isi bahariye abakundana, ukaba ufite amateka akomeye ku cyamamare Diamond kuko aribwo urukundo rwe na Zari babyaranye abana babiri rwarangiriye. Akaba ari nayo mpamvu yari yahisemo ko ariyo tariki yazarushingaho n’umukunzi we mushya Tanasha Donna.

Aba bombi baje guhindura iyi tariki y’ubukwe bwabo gusa ntibatangaza indi. Uyu mukunzi mushya wa Diamond, Donna yahishuye ko idini riri mu bintu byitambitse mu myiteguro y’ubukwe bwabo, umwe ni umuyisilamu undi na we akomeye ku bukirisitu.

Mu kiganiro kirekire uyu mukobwa yagiranye n’abamukurikira ku rukuta rwa Instagram, yababwiye ko nta mpamvu n’imwe yatuma ahindura aho yasengeraga.

Diamond ngo yabwiye Tanasha ko kuva muri Islam ari ikizira ndetse ko umuryango wamuca. Uyu mukunzi we Tanasha na we yanze kuva mu bakirisitu ngo abe umuyisilamu nk’uko Diamond abyifuza.

Umwe mubo mu muryango wa Diamond utarifuje ko amazina ye atangazwa, yeruriye ikinyamakuru Risasi Jumamosi ko uyu muvandimwe wabo adashobora kurongora umukobwa utemera gukurirkira inzira ye.

Yagize ati “Ni ikibazo gikomeye cyane. Twe twumvaga ko Tanasha azahindura idini ariko ndumva yatangiye kuzana ibibazo ku muvandimwe wacu Diamond. Icyo nzi neza, Diamond ntabwo yakorana ubukwe n’umugore udashaka gukurikira inzira ye, uwo badahuje idini byagorana cyane.”

Diamond nyiri ubwite ntaragira icyo atangaza kuri uku kutumvikana ku idini hagati ye n’umukunzi we Tanasha Donna ni mu gihe kandi abakunzi b’uyu muhanzi bategereje kumenya indi tariki azarushingaho.


Diamond n’umukuniz we Tanasha Donna bamaze igihe bari mu munyenga w’urukundo.

Tanga igitekerezo

Ntugire ikibazo Email yawe ntabwo tuyigaragaza kurubuga (*).

Ibitekerezo(7)