Perezida John Pombe Magufuli wa Tanzania yagaragaye bitunguranye mu isoko ry’amafi afite agatebo yari agiye guhahiramo mu rwego rwo gushyigikira gahunda ya leta yo guca ikoreshwa ry’amasashi.

Mu gihugu cya Tanzania ngo si ibisanzwe kubona umugabo atwaye ikintu cyo guhahiramo, by’umwihariko noneho uri ku rwego nk’urwa perezida.

Ibi rero Perezida magufuli akaba yabikoze mu rwego rwo kurushaho guha uburemere iki cyemezo cyo guca ikoreshwa ry’amasashi cyatangiye kubahirizwa muri Tanzania kuwa Gatandatu ushize.

Kuri ubu nk’uko tubikesha The East African, umuntu uzongera gufatwa akoresha isashi muri Tanzania azajya ahanishwa amande agera ku madolari 87 cyangwa iminsi ishobora kurenza icyumweru muri gereza.

Perezida Magufuri mu isoko afashe agatebo ari guhaha

Noneho uzafatwa akora cyangwa atumiza amasashi hanze y’igihugu, we azahanishwa amande agera ku 430,000 by’Amadolari cyangwa igifungo gishobora kurenza imyaka 2.

Igihugu cya Tanzania kikaba kibaye kimwe mu bihugu bigera kuri 30 byo muri Afurika byabimburiwe n’u Rwanda mu guce ikoreshwa ry’amasashi.

Kuri ubu umunyamahanga cyangwa undi winjiye muri Tanzania ahita asabwa gusiga amasashi afite ku kibuga cy’indege.

Ubwo yafata urugendo akigira mu isoko ry’amafi riherereye I Dar es Salaam, Perezida Magufuli yavuze ko yashakaga kwereka abaguzi muri Tanzania ngo hatagikenewe gukoresha amasashi.

Tanga igitekerezo

Ntugire ikibazo Email yawe ntabwo tuyigaragaza kurubuga (*).

Ibitekerezo(0)