Inama ngarukamwaka ya 6 y’ubushakashatsi mu bukungu yagaragaje ko u Rwanda rwashyize ingufu nyinshi mu kugabanya ubukene

Kuri uyu wa Kabiri tariki ya 25 Gashyantare 2020 i Kigali hateraniye Inama ngarukamwaka ya 6 y’ubushakashatsi ku bukungu itegurwa n’ikigo cy’Ubushakashatsi n’amahugurwa kuri Politiki y’Ubukungu (EPRN) ifatanyije n’izindi nzego zifite aho zihurira n’ubukungu.

Iyi nama yabereye muri Lemigo Hotel, yari ihurije hamwe abashakashatsi batandukanye n’impuguke mu by’ubukungu, Minisiteri y’ubuhinzi, abanyeshuri baturutse mu ma kaminuza atandukanye n’abandi bafite aho bahurira no gutezimbere ubukungu.

Yari ifite insanganyamatsiko igira iti “Kubaka ubushobozi butanga umusaruro mu guhindura ishusho y’ubukungu”.

Umuyobozi wa EPRN Rwanda, Kwizera Seth yavuze ko hakenewe igenamigambi rifasha kwongerera abaturage ubushobozi cyane cyane mu rwego rw’ubuhinzi.

Ati “Turebye nko mu rwego rw’ubuhinzi mu kwongera umusaruro abahinzi bacu baracyagendera cyane ku uko ikirere cyifashe kandi ntiwamenya wenda uko ejo kizaba kimeze, byagaragaye ko hakiri imbogamizi ku kugendera ku bintu tudafitiye controle. Rero haribazwa ngo hakorwa iki ngo tugire ubuhinzi butagendera kuri ibyo tudafitiye controle. Mu bucuruzi naho usanga tugifite ikibazo cy’uko bukorerwa mu gace kamwe mu gihe havutse ikibazo mu maze iminsi mwumva ibibazo by’abantu bakura ibicuruzwa mu gihugu kirimo virus runaka”.

Umujyanama muri Minisiteri y’Ubucuruzi n’Inganda, Robert Ubira yavuze ko u Rwanda rwashyizeho politike igamije gutezaimbere ubuhinzi bushobora guhangana n’ihindagurika ry’ikirere ndetse no gukoresha ikoranabuhanga n’ifumbire mu buhinzi. Yanasabye inzego zose kunoza ibyo bakora bigatanga umusaruro.

Dr Patrick Osakwe umushakashatsi akaba n’umuyobozi ushinzwe ubucuruzi no kurwanya ubukene mu ishami ry’umuryango w’abibumbye, yavuze ko ku Isi yose ubukenda bwibanda cyane muri Africa icyakora ngo u Rwanda nk’igihugu rwashyizeho ingufu nyinshi mu kugabanya ubukene.

Yakomeje avuga ko muri Africa hakenewe politiki ziteza imbere ubumenyi bwakoreshwa mu nganda kugirango izo nganda zitange umusaruro mu bwinshi no mu bwiza bw’ibyo zikora kugirango bigabanye ingano y’ibitumizwa mu mahanga hongerwe ibyoherezwayo kuko byafasha mu kugabanye ubukene mu baturage.

Kwizera Seth umuyobozi wa EPRN Rwanda.

Dr Patrick Osakwe umushakashatsi akaba n’umuyobozi ushinzwe ubucuruzi no kurwanya ubukene mu ishami ry’umuryango w’abibumbye (UNCTAD).

 

Tanga Igitekerezo ukoresheje Facebook

SHARE