Ingabire Immaculee ati “barabanje bazamura amazi, buracya bazamura amashanyarazi, uyu munsi bongeyeho ingendo”RURA izatuma abaturage banga leta.

Umuyobozi w’umuryango urwanya ruswa n’akarengane (Transparency International Rwanda) yavuze ko yababajwe cyane n’ibiciro bishya by’ingendo byashyizweho n’urwego rw’igihugu ngenzuramikorere RURA, bisimbura ibyari byashyizweho mugihe cya COVID19, ngo kuko bitsikamira umuturage, anavuga ko bizatuma abaturage banga leta.

Ibi biciro bishya byaje bisimbura ibyishyizweho muri COVI19, ubwo yarimo igaragara cyane mu Rwanda ndetse hanashyirwaho ingamba zitandukanye zo kuyirinda.

Muri izo ngamba harimo ko imodoka zitwara abantu mu buryo bwa rusange zigomba kujya zitwara umubare uri munsi y’uwo zatwaraga, mu rwego rwo kugirango hagati y’umugenzi n’undi habonekemo intera yatuma batanduzanya COVID19.

Ingabire Marie Immaculee ubwo yari mu Kiganiro Ahabona kuri RadioTv10

Icyo gihe imodoka zatwaraga 50% cyangwa kimwe cya kabiri cy’abagenzi bemerewe kugenda mu modoka kuko intebe yicaragaho abagenzi bane yicarwagaho na batatu.

Icyo gihe ibiciro by’ingendo byari biri hejuru cyane kuko abagenzi basabwaga no gusa nk’abishyurira ya myanya yindi itari irimo abagenze.

Tariki ya 12 Ukwakira inama y’abaminisitiri nyuma yo gusuzuma aho u Rwanda rugeze ruhashya icyorezo cya COVID19, yafashe icyemezo cy’uko imodoka zitwara abagenzi mu buryo bwa rusange zitwara abagenzi bose zemerewe gutwara bicaye ndetse na kimwe cya kabiri cy’abagenzi bahagaze ku modoka zifite ubu buryo.

Abaturage bavuga ko bagizweho ingaruga na COVID19, bari biteze ko ibiciro bisubizwa uko byari bimeze mbere y’iki cyorezo cyangwa bikajya munsi yaho kuko ibikomoka kuri peteroli nabyo ibiciro byabyo byagabanutse ku rwego rugaragara.

Gusa icyatunguranye ni uko ibi biciro byaje biri hejuru y’ibya mbere ndetse hari n’aho ibiciro byiyongereye kurusha n’ibiciro byo muri COVID19.

Urugero ni nk’aho urugendo rwo kuva Nyabugogo ugana Kimironko rwavuye kuri 383Frw rwariho muri COVID19 ubwo imodoka zatwaraga kimwe cya kabiri cy’abagenzi, ubu rukaba rwazamuwe kugera kuri 390Frw ubwo imodoka zemerewe gutwara abagenzi 100% by’abicaye na 50% by’abahagarara gusa aha RURA yatangaje ko byatewe n’ibirometero byiyongereye kuri iyi mirongo.

Hari n’ahandi usanga ibiciro byegeranye cyane nko kuva Kimironko ugana mu mujyi (DownTown) aho mbere ya COVID19 igiciro cyari 253Frw, kigashyirwa kuri 367Frw ubwo imodoka zatwaraga abagenzi 50%, none ubu aho gusubizwa uko byari bimeze mbere, igiciro cyashyizwe kuri 318Frw, ibintu abaturage binubiye cyane.

Ingabire Marie Immaculee ubwo yari mu Kiganiro Ahabona kuri RadioTv10 kuri iki Cyumweru tariki 18 Ukwakira 2020, yavuze ko yababajwe cyane no kuba RURA yarazamuye ibiciro by’ingendo, ititaye ku mvune n’ubushobozi bw’abaturage, ikareba ku nyungu z’abashoramari gusa, nyamara ibiciro by’ibikomoka kuri peteroli byaragabanutse ku buryo bugaragara.

” Byarambabaje cyane, kandi n’ubu ndacyabisubiramo, wagirango hari abantu batazi ukuri kw’imibereho y’abaturage, barabanje bazamura amazi, buracya bazamura amashanyarazi, uyu munsi bongeyeho ingendo.”

Yakomeje agira ati: “Abakozi ba RURA rwose baraho bameze neza kandi banahembwa neza, ariko se bajya bibuka ko Abanyarwanda twese tudafite ubushobozi bungana?”

Ingabire Immaculee yavuze ko RURA batitonze basenya leta kuko ibyo bakora byose abaturage bavuga ko ari leta ibikora, kandi bikaba binengwa cyane n’abaturage.

Ati: “Reka mbabwize ukuri, ndabizi ko bari buntuke, ariko RURA nibatitonda, RURA izasenya iyi leta. Iri kwiteranya n’abaturage mu buryo buteye ubwoba kandi bose barakubwira ngo ni leta, ntago bishimye kubera biriya bibazo bya transports.”

Tanga Igitekerezo ukoresheje Facebook