Inkotanyi mu busobe imyambaro ikunzwe cyane mu mujyi wa Kigali, yerekana ubutwari bw’inkotanyi

Inkotanyi mu busobe ni imwe mu myambaro imaze iminsi ikunzwe cyane ku masoko y’imyenda atandukanye cyane cyane mu mujyi wa Kigali.

Ni imyambaro yakozwe n’umunyamideli Tamba Olivier washinze inzu y’imideli ya Revolution Workshop, akaba yarayikoze ashaka kwigisha urubyiruko rwa Afurika guharanira kwikura mu bibazo barimo nkuko inkotanyi ku rugamba zabigenje.

Inkotanyi mu busobe ni imwe mu myambaro imaze iminsi ikunzwe cyane ku masoko y’imyenda atandukanye cyane cyane mu mujyi wa Kigali.

Iyi myambaro ikozwe mu mipira n’amakoti yo kwifubika ikaba yanditsweho ijambo Inkotanyi rikikijwe n’imirongo y’inzitane, bigaragaza urusobe rw’ibabazo ingabo z’Inkotanyi zanyuzemo ariko zikabasha kubohora u Rwanda.

Igitekerezo cyo gukora iyi myambaro cyaturutse ku kiganiro cyigeze guca kuri Radio ubwo Umujyanama wa Perezida mu by’umutekano Gen James Kabarebe, yasobanuraga urugendo rukomeye Inkotanyi zanyuzemo ngo zibashe guhagarika Jenoside yakorewe Abatutsi zibohore n’igihugu.

Amaze kumva urwo rugendo rutari rworoshye ariko intego yabo ikagerwaho, Tamba yatekereje ko bishobora kuba isomo ku rubyiruko rwo muri Afurika rukabasha kwikura mu bibazo ruhura nabyo.

Mu kiganiro yagiranye na IGIHE , Tamba Olivier, yavuze ko nyuma yo kumenya amateka y’Inkotanyi yahise ayahuza n’ibibazo urubyiruko rw’ubu ruhura nabyo, ahitamo gukora imyambaro yabatera akanyabugabo nabo bagakotana.

Ati “Hari amateka y’Inkotanyi agaragaza ibibazo bahuye nabyo mu gihe cyabo, nagerageje kuyahuza n’ibibazo by’ubuzima urubyiruko rufite muri iyi minsi. Nubwo hatakiri intambara ariko hari ibindi bibazo bihari, ku buryo urubyiruko rushobora kwigira ku Nkotanyi rukikura muri ibyo.”

Ni imyambaro ikunzwe cyane n’urubyiruko

Yakomeje avuga ko iyi myambaro abayireba badahita bifuza kuyigura ariko iyo bamaze gusobanukirwa n’amateka y’Inkotanyi bahita bayigura, ibi bikagaragaza ko intego yo kwigisha urubyiruko gukotana igenda igerwaho.

Ati “Urubyiruko rwinshi ntirupfa kuyigura ariko iyo bamaze kumenya amateka n’icyo iyi myambaro ishatse gusobanura bahita bayikunda cyane, kuko ituma biyumvamo gukotana bagahangana n’ibibazo banyuramo ubu.”

Iyi myambaro iboneka mu mabara atandukanye. Kuva yakorwa hamaze kugurwa isaga ibihumbi bitanu, kandi abayigura basobanurirwa amateka y’Inkotanyi bakiyemeza gukotana nkazo.

Iyi myambaro n’indi igaragaza amateka y’u Rwanda ikorerwa muri Revolution Workshop iboneka aho ikorerwa no ku mbuga nkoranyambaga zabo Revolution Workshop.

Tanga Igitekerezo ukoresheje Facebook

SHARE