Iran yagabye igitero ku ngabo za Amerika hapfa 80, Donald Trump yagize ubwoba arashaka icyagarura umwuka mwiza hagati y’ibihugu byombi

Perezida wa Leta Zunze Ubumwe za Amerika(USA) Donald Trump , aragenda agabanya umurego wo gukomeza urugamba rwa gisirikare n’igihugu cya Iran, ahubwo akaba asa n’ushaka icyatuma hagaruka umwuka mwiza hagati y’ibihugu byombi.

Ni nyuma y’aho ingabo za Washington zigabye igitero ku barwanyi ba Iran zari i Bagdad muri Irak kigahitana Jenerali Soleimani n’abandi barwanyi bari kumwe mu cyumweru gishize.

Nyuma y’iminsi itatu Amerika yishe Qassem, ingabo za Téhéran ntizazuyaje nazo zarashe ibisasu bya roketi 10 mu nkambi zicumbitsemo Abasirikare ba USA muri Irak mu rwego rwo kwihora.

Radio Mpuzamahanga y’u Bufaransa RFI, itangaza ko kimwe mu bigaragaza ko Perezida Trump yirinda ko igihugu ke kijya mu ntambara na Iran ari uko ngo ingabo za Leta ya Téhéran zikimara kurasa ku birindiro by’Abasirikare bayo bari muri Irak, Donald yahise avuga ko bagiye kongera ibihano by’ubukungu ku byo bari barafatiye Iran, ariko ngo yirinda kuvuga ko ingabo z’Amerika zongera kurasa ku barwanyi ba Iran bari muri Irak.

RFI iti“Nyuma y’aho Ubutegetsi bwa Téhéran burasiye ibisasu byo mu bwoko bwa roketi ku birindiro by’Abasirikare b’Amerika bari muri Iran, Donald Trump nta bwo yongeye guhitamo gukoresha imbaraga za gisirikare nk’uko yabikoze mu cyumweru gishize. Ahubwo yoroheje ibintu kugira ngo akarere kose katagwa mu kaga k’intambara “.

Gusa, Umukuru w’Igihugu cy’Amerika ku wa Gatatu tariki 08 Mutarama yatangaje ko, ngo nta Munyamerika waguye muri ibyo bitero bya Iran.

Televisiyo ya Irani yatangaje ko muri kiriya gitero hapfuye Abanyamerika 80

Kugabanya umurego w’urugamba kwa Amerika byashimangiwe na Prof. Philip Golub, umwarimu muri Kaminuza akaba n’impuguke muri poritiki mpuzamahanga ya Amerika, asanga Donald Trump guhitamo gukaza ibihano by’ubukungu ku gihugu cya Iran ngo ari uburyo bwo kugenza make kugira ngo intambara y’amasasu idakomeza.

Prof. Philip Golub ati “Nta bwo Amerika yigeze itegura kurwana na Iran urugamba rw’amasasu. Ahubwo hashize umwaka umwe n’igice, Donald Trump n’abambari be bakoze gahunda yo guhirika ubutegetsi bw’iki gihugu binyuze mu nzira y’ibihano by’ubukungu.”

Umusesenguzi Prof. Philip Golub yemeza ko uyu mushinga wa USA wo guhirika ubutegetsi bwa Téhéran binyuze muri poritiki yo kuyifatira ibihano bikomeye by’ubukungu itagitanze umusaruro, nyuma yo kwica Jenerali Qassem Soleimani.

Ati“Ahubwo nge nsanga buriya buryo buhaye imbaraga Iran kuko bwatumye abenegihugu bose biyunga birenze uko bari basanzwe, kugira ngo barwanire hamwe uru rugamba bita agasuzuguro k’Amerika. Donald Trump gukoresha ziriya ngufu za gisirikare mu kwica Soleimani, yatsinzwe kuko yatumye Abanya Irani barushaho kwegerana na Leta yabo”.

RFI yemeza ko Trump yahisemo guhagarika urugamba rwa gisirikare n’igihugu cya Iran kugira ngo yirinde gutakaza amajwi y’abamushyigikiye mu matora ya Perezida, aho na we ari umukandida uziyamamaza. Abanyamerika benshi ngo ntibashyigikiye imirwano na Téhéran.

Igitangazamakuru Fox News kemeza ko umubare munini w’abagize inteko itora ngo badashyigikiye habe na busa, intambara hagati y’Amerika n’ibihugu byo mu burasirazuba bwo hagati y’Isi bibarizwamo Iran n’ibindi.

Philip Golub yungamo agira ati « Iyi gahunda y’amatora ya Perezida ateganyijwe muri Amerika, ni yo Trump yashingiyeho ashaka uburyo ikibazo igihugu ayobora gifitanye na Iran cyarangira hatabayeho gukoresha ingufu za gisirikare »

Iki kibazo gihangayikishije cyane Leta ya Irak, kubera ko Washington na Téhéran bahinduye igihugu cyabo ikibuga k’imirwano. AbanyaIrake batangaje ko batumva impamvu ubusugire bw’igihugu cyabo buvogerwa bene ako kageni.

Tanga Igitekerezo ukoresheje Facebook

SHARE