Israel Mbonyi yatunguwe n’ubwitabire mu gitaramo cyambere yakoreye mu ntara (Amafoto)

Kuri iki Cyumweru tariki ya 2 Gashyantare 2020 nibwo Israel Mbonyi uyoboye mu ndirimbo zo kuramya no guhimbaza Imana yakoreye igitaramo gikomeye muri Kaminuza y’u Rwanda ishami rya Huye. Iki gitaramo nicyo cya mbere kinini uyu muhanzi yari akoreye hanze ya Kigali, atangaza ko yatunguwe cyane n’ubwitabire.

Muri iki gitaramo Israel Mbonyi yari ari kumwe n’abahanzi nka Serge Iyamuremye, Prosper Nkomezi n’abanyempano b’i Huye ari bo Danny Mugabo Gakwaya na Elia.

Cyatangiye mu masaha ya saa cyenda z’amanywa gisozwa ahagana saa mbiri z’ijoro, Pastor Gaudin Mutagomwa wabaye Pasiteri wa Mbonyi muri Kaminuza mu Buhinde niwe wari uyoboye gahunda (MC).

Pastor Gaudin ufatanya kubwiriza no kuririmba yatangiye yinjiza abantu mu mwuka wo kuramya yifashishije indirimbo zo mu gitabo zirimo “Yanyishyuriye”.

Israel Mbonyi wari umuhanzi mukuru niwe wabimburiye abandi ku rubyiniro bitandukanye n’ibyari bimenyerewe mu bindi bitaramo. Yageze imbere ku rubyiniro saa kumi n’iminota icumi z’umugoroba. Yinjiriye mu ndirimbo ’Nzi ibyo nibwira’ yahise yakirwa neza n’abakunzi b’izihimbaza Imana bari buzuye muri auditorium ya Kaminuza y’u Rwanda.

Uyu muhanzi nyuma y’iyi ndirimbo yahereyeho, yarebye mu bafana ubwitabire buramurenga agira ati “Mbega byiza!”. Yanzitse akomereza ku zindi ndirimbo ze ziri kuri album ye ya mbere zirimo “Ku migezi”, “Uri Number One”, “Ndanyuzwe”, “Ku musaraba”, “Mfite impamvu” n’izindi.

Ahagana saa kumi n’ebyiri, Mbonyi yagarutse ku rubyiniro mu gice cya kabiri yanahinduye imyenda maze aririmba indirmbo ze ziri kuri album ya kabiri. Bitunguranye yaje kwakira Jules Sentore aririmba ‘Warakoze Mana’ yishimiwe cyane maze uyu muhanzi waragijwe injyana gakondo avuga ko nawe asanzwe ari umufana wa Mbonyi kandi azi indirimbo ze zose.

Nyuma y’igitaramo Israel Mbonyi yatangaje ko yatunguwe n’ubwitabire, Ati “Nishimye cyaneee ubwitabire bw’abantu benshi, ni ibintu ntari niteze rwose. Byandenze pe!. Ni yo concert yanjye ya mbere yo mu ntara. Natunguwe.”

Muri iki gitaramo cyatewe inkunga na Airtel Rwanda, Polisi yahawe umwanya yibutsa abari aho kuzirikana gahunda ya Gerayo Amahoro.

Umuvugizi wa Polisi y’u Rwanda mu Ntara y’Amajyepfo, CIP Sylvestre Twajamahoro Yavuze ko bifuza ko ‘Gerayo Amahoro’ iba umuco mu Rwanda. Yavuze ko ‘Gerayo Amahoro’ itabuza abantu kureka kunywa inzoga, ahubwo ko ibashishikariza kwirinda kunywa igihe bagiye gutwara kuko bishyira mu kaga ubuzima bwabo n’ubw’abandi banyuranye.

 

 

 

 

Tanga Igitekerezo ukoresheje Facebook

SHARE