Hari ibintu byinshi abakristo batavugaho rumwe, bamwe bati : ni icyaha, abandi bati sicyo ; Ingero : nk’isabato, kurya inyama, kunywa inzoga, imyambarire ( Nko kwambara amapantaro kubagore ), n’ibindi byinshi. Izo mpaka akenshi ziterwa no kuba abantu benshi batazi neza igisobanuro cy’icyaha.

Ubusanzwe ‘’ ICYAHA ’’ ni ukwica itegeko, ntihashobora kubaho icyaha hatabayeho kwica itegeko. Kugirango rero umenye ko igikorwa runaka ari icyaha, ugomba kumenya itegeko ry’Imana rikibuza : Aha turahita twibaza ngo : amategeko y’Imana ni ayahe ?

Bibiliya irimo amategeko menshi cyane, ntibyoroshye no kuyarondora, muri ayo mategeko harimo n’ay’imihango, ariko ayo amategeko yose akubiye mu itegeko rimwe ry’ ‘’ URUKUNDO ’’ : Rom.13:8-10, Mat.7:12 ; muri make itegeko ry’Imana ni rimwe rukumbi : ni ’URUKUNDO’.

Ni ukuvuga ko icyaha nacyo ari kimwe ‘’UBUGOME ( ikinyuranyo cy’urukundo )’’ : 1Yoh.3-4.

Kubera ko itegeko ari ‘’URUKUNDO’’ kandi urukundo rukaba rusohoza amategeko yose, ni ukuvuga ko amategeko yose adasohozwa n’urukundo, ariyo mategeko y’imihango ijambo ry’Imana rivuga. Bibiriya itubwira ko amategeko y’imihango Yesu yasohoresheje urupfu rwe, naho twebwe tuyasohoresha kubatizwa n’amazi, nk’ikimenyetso cyo gupfa no kuzukana na Kristo : Kolo.2:12-17, 20-23 ; Rom.6:3-4.
Ikigaragaza ko itegeko ari iry’umuhango (ko ridasohozwa n’urukundo), nuko ibyo iryo tegeko riba ribwira abantu kwirinda, biba ari ibintu bitazwi muri kamere y’umuntu ko ari bibi, ariko itegeko ry’urukundo ryo ribuza abantu ibintu bisanzwe bizwi muri kamere y’umuntu ko ari bibi (ubugome), bidasabye ko umuntu abyigishwa cyangwa ngo abisome muri bibiriya : Yer.31:31-34 ; Heb.10:15-17.

Ninayo mpamvu kumunsi wo gucira abantu urubanza ntarwitwazo ruzabaho, ngo sinabimenye, sinarinzi amategeko, baranyobeje n’ibindi.
Ugendeye kuri ibi bisobanura wahita umenya igikorwa icyo aricyo cyose abantu bajyaho impaka, niba koko ari icya cyangwa ataricyo.

Ubugome : Ni igikorwa cyose, icyifuzo cyangwa umugambi bizwi muri kamere y’umuntu ko ari bibi (igihe bikozwe ku bushake) ; kandi ubugome niko kwica amategeko y’Imana, kuko uba wishe itegeko ry’urukundo, kandi urukundo niyo mategeko. Uku niko ijambo ry’Imana ritubwira : 1Yoh.3:4,4 Umuntu wese ukora icyaha, aba agomye, kandi icyaha ni bwo bugome.

Tanga igitekerezo

Ntugire ikibazo Email yawe ntabwo tuyigaragaza kurubuga (*).

Ibitekerezo(0)