Jidenna yanywereye itabi ku rubyiniro, Bruce Melody ashimangira ubuhanga bwe mu gitaramo cya KJJ (Amafoto)

Mu ijoro ryo kuri uyu wa Gatanu nibwo icyamamare mu muziki Jidenna na Bruce Melody bakoreye abakunzi babo igitaramo cy’amateka mu bizwi nka Kigali Jazz Junction gisoza ukwezi k’Ugushyingo 2019.

Iki gitaramo cyari kitabiriwe ku rwego rwo hejuru n’abiganjemo urubyiruko, cyabereye muri Kigali Conference and Exhibition Village (KCEV) ahazwi nka Camp Kigali.

Umunyamerika w’umuraperi ufite inkomoko muri Nigeria, Jidenna Theodor Mobisson akaba ari mu bahanzi bagezweho muri iki gihe niwe wari umuhanzi w’Imena muri iki gitaramo. Yashimishije bikomeye abakunzi b’umuziki we b’i Kigali bari biganjemo abakobwa bari babukereye ku bwinshi.

Jidenna wamaze isaha n’igice ku rubyiniro, yaririmbye nyinshi mu ndirimbo ze ziganjemo iziri kuri album ye nshya yise ’85 to Africa’ avangamo n’izindi nka ‘Classic man’ ‘Sfuffi wimah’ ‘Bambi’ ‘Little Bit’ ‘Particula’ n’izindi ze zanyuze abakunda kwizihirwa.

Buri ndirimbo yose yateraga yikirizwaga akayisoza akomerwa amashyi n’akaruru k’ibyishimo ubona abantu bari mu mwuka wo kubyina.  Yanyuzagamo akaganira n’abafana be abashimira kuba bitabiriye igitaramo ndetse anakomeje kumushyigikira.

Jidenna ageze hagati mu gitaramo, yatunguranye acana itabi ku rubyiniro atangira kurinywera imbere y’abafana be, uko yanywaga itabi ninako yasomezaga ikinyobwa yari afite mu gakombe ka pulasitiki.

Bruce Melody niwe wabanjirije Jidenna ku rubyiniro nawe yishimiwe bikomeye mu ndirimbo ze zitandukanye nka ‘Katerina’ ‘Kungola’ yafatanyije na Sunny ‘Ndakwanga’, ‘Ikinya’ n’izindi.

Uyu muhanzi wongeye gushimangira ko ari umwe mu mpano zikemeye u Rwanda rufite muri muzika,yinjiye ku rubyiniroyambaye ipantalo n’ikote bisa nyuma abikuramo asigarana umupira w’umukara n’ipantalo y’umukara maze ataramira abakunzi be asoza bamwirahira.

Mbere ya Bruce Melody itsinda ry’abanyamuziki rya Neptunez Band ndetse n’abasore babiri bavanga imiziki bagize Nep Djs nibo batangiye basusurutsa abari bitabiriye iki gitaramo.

Iki gitaramo cyari cyatangiye ahagana saa mbiri z’ijoro cyasojwe ku isaha ya saa sita n’igice.

Jidenna yavuye ku rubyiniro ajya kuririmbira hagati mu bafana be.
Jidenna yacanye itabi arinywera ku rubyiniro.
Nyuma yo kunywa itabi yahise asomeza ikinyobwa benshi baketse ko ari inzoga.
Bruce Melody yatungutse ku rubyiniro yambaye gutya.

Nep Djs nibo bavangaga imiziki muri iki gitaramo.

 

 

Tanga Igitekerezo ukoresheje Facebook

SHARE