Joeboy na Davis D bateguje abazitabira Jazz Junction igitaramo cy’uburyohe

Umuhanzi Joeboy ukomoka muri Nigeria na Davis D batahiwe kuzaririmba mu gitaramo cya Kigali Jazz Junction kuri uyu wa Gatanu, basabye abakunzi ba muzika y’umwimerere kuzaza ari benshi kuko bazahagirira ibihe byiza.

Joeboy ubusanzwe witwa Joseph Akinfenwa Donus yageze i Kigali mu ijoro ryo kuri uyu wa gatatu tarikiya 26 Gashyantare 2020.

Mu kiganiro uyu muhanzi yagiranye n’abanyamakuru mu gitondo cyo kuri uyu wa Kane muri Kigali Marriott Hotel ari kumwe na Davis D bazahurira muri iki gitaramo, abagitegura ndetse n’abaterankunga bacyo.

Joeboy uzaba ataramira mu Rwanda ku nshuro ya mbere, yavuze ko ari ibyagaciro kuri we asaba abakunzi be kuzaza ari benshi bagasoza ukwezi kwa Gashyantare mu buryohe bwa muzika.

Ati “Ni ubwa mbere ngiye gutaramira mu Rwanda, ndabyishimiye muzaze ejo muri Kigali Jazz Junction tuzabyina, tuzagira ibihe byiza tuzanezerwa”.

Uyu musore ufite imyaka 23 y’amavuko, azwi mu ndirimbo zitandukanye harimo nka ‘Beginning’ ‘All For You’ na ‘Baby’ yamufashije kwigarurira imitima ya benshi byumwihariko abari n’abategarugori.

Yavuze ko afata Mr Eazi nk’umuntu wagize uruhare rukomeye ku muziki we ndetse by’umwihariko akishimira kuba abarizwa mu nzu ye ifasha abahanzi.

Davis D uri mu bahanzi bagezweho hano mu Rwanda, yavuze ko azakoresha neza amahirwe yabonye yo kuba agiye guhurira ku rubyiniro na Joeboy kuburyo bashobora no gukorana indirimbo.

Ureste aba babiri iki gitaramo kizanaririmbamo Niyo Bosco ubana n’ubumuga bwo kutareba  ariko uri kubica muri iyi minsi, itsinda Neptunez Band na Nep Djs. Kikazabera mu ihema rya Camp Kigali(KCEV).

Kwinjira ni 10.000Frw mu myanya isanzwe, 20.000 mu myanya y’icyubahiro, 25.000Frw mu myanya y’ikirenga na 200.000Frw ku meza y’abantu umunani (8).

Joeboy wambaye umupira utukura na Davis D wambaye uw’ubururu ubwo bari mu kiganiro n’itangazamakuru kiyobowe na Remmy umuyobozi wa RG-Consulr itegura ibitaramo bya Kigali Jazz Junction.

Joeboy agera i Kigali yakiriwe na Miss Anastasie.

 

 

Tanga Igitekerezo ukoresheje Facebook

SHARE