Kabuga Félicien ushinjwa uruhare rukomeye muri Jenoside yafatiwe mu Bufaransa

Félicien Kabuga, umwe mu bakekwaho uruhare rukomeye muri Jenoside yakorewe Abatutsi mu 1994, yatawe muri yombi afatiwe I Paris mu Bufaransa nyuma y’igihe kinini yari amaze ashakishwa.

Uyu mugabo yari muri baruharwa bashakishwaga kubera ibyo bakoze muri Jenoside, yari yarashyiriweho miliyoni 5 z’amadorali ku muntu uzamufata cyangwa agatanga amakuru yaho aherereye.

Yafashwe kuri uyu wa Gatandatu tariki 16 Gicurasi 2020, mu mujyi wa Paris mu Bufaransa afashwe n’ubuyobozi bw’iki gihugu.

Urwego rwasimbuye Urukiko Mpanabyaha rwa Arusha, IRMCT ni rwo rwatangaje aya makuru. Ruvuga ko Kabuga yafashwe n’inzego z’u Bufaransa, nk’umusaruro w’ubufatanye bwari buhari bugamije gushakisha Kabuga wari umaze imyaka 26 yihishahisha.

Ubushinjacyaha bw’u Bufaransa bwemeje ko uyu mugabo yari asanzwe aba mu Bufaransa aho yari yarahinduye imyirondoro ye.

Ngo yabaga mu icumbi ryo mu gace ka Asnières-sur-Seine mu buryo buteguwe neza, bigizwemo uruhare n’abana be.

Félicien Kabuga w’imyaka 84 afatwa nk’uwabaye umuterankunga ukomeye wa Jenoside, aho mu Ugushyingo 1993, icyo gihe sosiyete ye Kabuga yinjije mu gihugu toni 25 z’imihoro ivuye mu Bushinwa, nyuma muri Werurwe 1994 agura indi mihoro ibihumbi 50. Ni intwaro zakoreshejwe mu kwica abatutsi muri Jenoside.

Uretse ibyo ashinjwa ko ari n’umwe mu banyamigabane bashinze radio RTLM, yagize uruhare rukomeye mu kubiba urwango mbere no mu gihe cya Jenoside.

Biteganyijwe ko uyu mugabo azurizwa indege akajyanwa mu Buholandi ahakorera urwego rwasimbuye Urukiko Mpanabyaha bya Arusha (IRMCT).

Umushinjacyaha Mukuru w’uru rwego, Serge Brammert, yavuze ko ifatwa rya Félicien Kabuga ari nk’igikorwa cyibutsa ko abantu bose bakoze Jenoside bagomba kubiryozwa, nubwo hashize imyaka 26 icyaha bakoze kibayeho.

 

Tanga Igitekerezo ukoresheje Facebook

SHARE