Kigali : Ubukwe bwari bwahuruje imbaga bwapfuye kumunota wanyuma abageni bagiye gusezerana mu mategeko, umusose ahita yinjizwa muri gereza(Amafoto)

1

Amarira n’agahinda, kwifata ku munwa, uburakari n’umujinya hamwe n’ibitwenge kuri bamwe, nibyo byari biri ku Kimisagara mu mujyi wa Kigali mu masaha y’umugoroba wo kuri uyu wa Kane tariki 5 Mutarama 2017, nyuma y’uko ubukwe bwari bugiye kuhabera bwapfuye ku munota wa nyuma, hakavumburwa ubutekamitwe n’amanyanga yakozwe n’umugabo wari ugiye gusezerana kandi asanzwe afite abandi bagore babiri n’abana bane, ndetse bikarangira ahise anafungwa.

bca019d56fb2ca7aa5a8dc8d337706
Louise Mukasekuru na Nzamwita Felix yitaga umusore kandi ari umugabo ufite umugore, bari babukereye baje gusezerana imbere y’amategeko

Louise Mukasekuru, umukobwa mugufi cyane wamamaye cyane mu mujyi wa Kigali aho benshi bakunda kumwita Nyampinga cyangwa “Miss”, byari biteganyijwe ko asezerana imbere y’amategeko na Nzamwita Felix yitaga umusore kandi ari umugabo ufite umugore basezeranye akagira n’undi batasezeranye, bombi bagiye babyarana abana babiri.

Byari biteganyijwe ko basezerana ku isaha ya saa munani z’amanywa yo kuri uyu wa Kane tariki 5 Mutarama 2017, ibi birori bikaba byagombaga kubera ku murenge wa Muhima, ariko byahise byimurirwa ku murenge wa Kimisagara kuko gitifu wa Muhima yari yagize ibyago atabasha kuboneka.

Ubu bukwe bwari bwahuruje imbaga, Nyampinga na Nzamwita bari babukereye bitegura ko uyu munsi bagiye kwishimana bagasezerana kubana nk’umugabo n’umugore byemewe n’amategeko. Bageze mu cyumba mberabyombi cy’umurenge wa Kimisagara bafata ibyicaro kimwe n’abandi bageni, batangira gukurikirana inyigisho z’abagiye kurushinga hamwe n’abandi bagombaga gusezeranira rimwe.

Mu buryo butunguranye, abasore babiri bavukana na Nzamwita Felix binjiye muri uyu murenge, bavuga ko aba bageni badashobora gusezerana kuko uyu ari umugabo wasize abagore babiri mu karere ka Rusizi mu Burengerazuba bw’u Rwanda, kandi buri mugore muri abo bakaba barabyaranye abana babiri. Ibi ntibyari amagambo gusa, aba bavandimwe ba Nzamwita bari banitwaje ibyemezo by’uko yashyingiwe (attestation de marriage) ndetse bafite n’ifoto ya Nzamwita n’umugore we w’isezerano, ku munsi w’ubukwe bwabo aho bari bamaze kubatwikurura.

Save the date, ubu bukwe bwari butegerejwe na benshi
Save the date, ubu bukwe bwari butegerejwe na benshi

Ibintu byahise bihindura isura, abantu bagwa mu kantu bamwe batangira kurira abandi umutima urabasimbuka ibyari ubukwe bihinduka induru, maze ubuyobozi bw’umurenge wa Kimisagara bubajyana mu kindi cyumba cy’ibiro, abandi bageni barasezerana. Abantu barushijeho kuba benshi aha ku Kimisagara, hategerejwe umwanzuro ufatwa. Inshuti n’abo mu muryango wa Mukasekuru Louise bakunda kwita Nyampinga.

N’agahinda kenshi bamwe banarira, batangaje ko uyu mugabo nta kintu na kimwe yari afite nta n’icyo yatanze mu myiteguro y’ubukwe, ahubwo ngo umukobwa ni we wamuhaye amafaranga kugeza no ku yaguzwe imyenda y’ubukwe uyu musore yari yambaye n’iyo yagombaga kuzambara kuwa Gatandatu mu mihango yo gusaba no gukwa ndetse no gusezerana imbere y’Imana. Bavuga ko Nyampinga yari afite inzu, ndetse akaba yari afite na moto yakoreraga amafaranga, iyo moto akaba yarayigurishije agaha umusore amafaranga ngo abashe kwitegura ubukwe.

Undi twaganiriye ni murumuna wa Nzamwita, bahuje ababyeyi bombi. Uyu musore uri mu bazanye ibimenyetso bigaragaza ko umuvandimwe we adakwiye gusezerana, avuga ko yabwiye mukuru we ko ibyo agiye gukora ari amakosa akamunanira, bikagera n’ubwo ashaka nimero ya telefone y’umukobwa na we akabimubwira, ariko akanga kumwumva kuko Nzamwita ngo yari yaramubwiye ko abavandimwe be bamwanga, bakaba badashaka ko banakora ubukwe bavuga ngo ni mugufi. Ngo yari yaramusabye kubima amatwi, amwizeza ko ikibyihishe inyuma ari uko abo mu muryango we bashaka kumwicira ubukwe.

Hanze y’ibiro by’umurenge abantu bakomezaga kurira cyane abandi bumiwe bagaragaza ko bababaye. Igihe cyaje kugera inzego za Polisi zisohora Nzamwita zimujyana mu cyumba kirimo imfungwa na we baramufunga, ariko kumugezamo byari intambara kuko hari abantu benshi bavugaga ko bashaka kumwikubitira bakamwihanira, ndetse hari n’abavugaga ko atagomba gufungwa yambaye ikote yari yaguriwe n’umukobwa yahemukiye.

3640a58a842767186b5ddf1f2f2c7b
Mukasekuru Louise bakunda kwita Nyampinga mu kwitegura ubukwe yakorewe ibirori bibanziriza ubukwe bizwi nka Bridal Shower, inshuti ze zimusezeraho

Munkuru dukesha ikinyamakuru Ukwezi, bavugako Mukasekuru Louise uzwi nka Nyampinga gusohoka mu cyumba cy’ibiro by’umurenge byamugoye cyane, abantu hanze bakomeza kuvuga ko agahinda kamwishe amarira yabaye menshi, hategerejwe ko abantu babanza kumuganiriza kugirango abashe kwakira ibyamubayeho.

c5c36ec501e623ffb3c3304d83d6d2

157,185 total views, 43 views today

IBYAVUZWE KURI IYI NKURU 1

ANDIKA ICYO UTEKEREZA KURI IYI NKURU