Kigali : Umubyeyi wari umaze imyaka 12 yarabuze urubyaro yibarutse abana bane b’impanga.

Mu rukerera rwo ku wa 25 Ukuboza 2020 mu Bitaro byitiriwe Umwami Faisal umubyeyi witwa Liliane wari umaze imyaka 12 atabyara yibarutse abana bane b’impanga.

Uyu mubyeyi yabyaye neza abana bane barimo abahungu batatu ndetse n’umukobwa umwe, bose bavukanye hejuru y’ikilo kimwe.

Liliane wari umaze imyaka 12 atabyara yibarutse abana bane b’impanga.

Uyu muryango wa Liliane na James wari umaze imyaka 12 utabyara, wabyaye aba bana nyuma yo gukoresha uburyo bwo guhuza intanga hakoreshejwe ikoranabuhanga.

IGIHE yamenye ko uyu muryango wari ufite ikibazo cyo kutabyara wakoresherejwe uburyo bwo guterwa intanga binyuze mu ikoranabuhanga.

Uwaduhaye amakuru yagize ati “Aba bantu bagiye kwa muganga bafite ikibazo cyo kutabyara barakurikiranwa bakangurirwa gukoresha uburyo bwo guterwa intanga hakoreshejwe ikoranabuhanga kuko uburyo busanzwe bwari bwaranze.”

Yakomeje ati “Habayeho rero uburyo bwo guhuza intanga kandi ubu buryo uko bukora uko ushyizemo abana benshi niko biha umubyeyi amahirwe yo gufata, aba bashyizwemo abana bane barafata kugeza babyaye.’’

Umubyeyi wibarutse abana bane kuri ubu aracyari kwitabwaho mu bitaro ndetse abana be bose bameze neza.

Mu Bitaro bya Faisal kandi mu mwaka ushize wa 2020 habyariyemo abandi babyeyi babiri babyaye impanga z’abana bane n’abandi babiri babyaye impanga z’abana batatu.

Tanga Igitekerezo ukoresheje Facebook

SHARE