Kim Kardashian agiye kutandukana na Kanye West bamaranye imyaka igera kuri itatu barushinze

0

Kim Kardashian umugore w’umuraperi Kanye West bamaze imyaka igera kuri itatu barushinze mu buryo bwemewe n’amategeko, biravugwa ko ashaka kwaka gatanya nyuma y’iminsi y’ibibazo by’urudaca mu rugo rwabo.

Ikinyamakuru Us Weekly cyatangaje iyi nkuru bwa mbere, cyavuze ko cyabwiwe n’inshuti ya hafi ya Kim Kardashian ko mu buryo bw’ibanga amaze igihe ategura umugambi wo gutandukana na Kanye West gusa akaba yarabanje kubyitondera kubera ibibazo by’uburwayi umugabo yari amaranye iminsi.

kim-kardashian-kanye-west-north

Iyi nshuti ya Kim Kardashian itatangajwe amazina yavuze ko ‘ashaka gatanya’ kuko ‘yiyumva nk’uwazirikiwe mu rushako’, yongeyeho ko ariko ‘bizasaba igihe mbere y’uko agira icyo akora’. Yanatangaje ko Kim Kardashian amaze igihe ari gutegura ikirego kizatuma ahabwa abana bose yabyaranye na Kanye West.

Kanye West na Kim Kardashian bafitanye abana babiri aribo North “Nori” West w’imyaka itatu na Saint West ufite umwaka umwe. Aba bombi batangiye gukundana muri Mata 2012, basezerana kubana mu birori byabereye mu Butaliyani byabaye tariki 24 Mata 2014.

Hari hashize iminsi Kanye West agize uburwayi butunguranye bwiganjemo uruhurirane rw’ibibazo byo mu mutwe n’ihuzagurika mu mitekerereze, yamaze iminsi igera ku icyenda arwajwe n’umugore we mu bitaro bya Ronald Reagan UCLA Medical Center biri mu Mujyi wa Los Angeles.

Yavuye mu bitaro ku mugoroba wo kuwa Gatatu tariki ya 30 Ugushyingo 2016. Kugeza n’ubu ntaramerwa neza mu buryo bukwiye, yariheje mu muryango we ajya kuba wenyine kugira ngo yongere gusubira ku murongo. Mbere yo kujyanwa mu bitaro, hari hashize amasaha make asubitse ibitaramo bigera kuri 21 yari asigaje gukora mu rugendo rw’ibindi byinshi yise ‘Saint Pablo Tour’.

kim-kardashian-kanye-west-2015-grammy-arrivals

Ibibazo by’uburwayi butunguranye Kanye West yahuye nabyo yabigize nyuma y’ibyumweru bitatu Kim Kardashian na we acucuwe n’abajura bitwaje imbunda bamusanze muri hoteli yari acumbitsemo ubwo yari ari i Paris mu Bufaransa bakamwiba amafaranga yo kwifashisha yari yagendanye ndetse n’imirimbo ihenze ibarirwa agaciro ka miliyoni eshatu z’amadolari.

Inshuti ya Kim Kardashian yahishuye amakuru yo kuba uyu mugore ashaka gatanya, yatangaje ko atazafata icyemezo umugabo we atarakira neza. Ati “Yita kuri Kanye West kandi arumva atuje kuko [Kanye West] ari kubona ubufasha bwose akeneye.”

Yanavuze ko uyu mugore w’icyamamare ku Isi amaze iminsi arindira kure abana yabyaranye n’umugabo we Kanye West kubera ibyo bibazo by’uburwayi amaranye iminsi.

Mbere ya Kanye West, Kim Kardashian yari yaratandukanye n’abandi bagabo babiri barimo Damon Thomas na Kris Humphries ukina muri NBA[uyu bamaranye iminsi 72 bahita batandukana]. Kanye West we mbere yo kurushinga na Kim Kardashian azwiho kuba yarakundanye na Amber Rose kuva mu 2008 kugeza mu mwaka wa 2010.

kim-2 kim

kim-kardashian-kanye-west-miami-09172016-6-compressed
kim-kardashian-kanye-west-miami-concert-2016-pictures

59,325 total views, 43 views today

Comments

comments

ANDIKA ICYO UTEKEREZA KURI IYI NKURU