Kimenyi Yves yahawe amafaranga n’abana ba Rayon, ava ku muryango wa 11 ayora agera ku wa 17, igikapu cyuzuye, andi abura aho ayashyira(Amafoto)

Umunyezamu wa Rayon Sports, Kimenyi Yves yashimiwe cyane n’abafana b’iyi kipe nyuma yo kuyifasha kugera ku mukino wa nyuma w’Irushanwa ry’Agaciro 2019 ubwo yakuragamo penaliti ebyiri za Police FC maze ikipe ye igatsinda 4-3 mu mukino wabereye kuri Stade Amahoro kuri uyu wa Gatandatu.

Amakipe yombi yari yanganyije ubusa ku busa mu minota 90 isanzwe y’umukino.

Kimenyi Yves wafashije Rayon Sports no mu buryo butandukanye Police FC yabonye hagati mu mukino, yakuyemo penaliti yatewe na Mpozembizi Mohamed n’indi yatewe na Iyabivuze Osée.

Kimenyi umunezero wari wose

Ubwo abakinnyi ba Rayon Sports bari bamaze gushimira abafana ko bababaye inyuma muri uyu mukino, abari mu gice cya 11 muri stade batangiye kuririmba ngo “Kimenyi Yves, Kimenyi Yves” maze na we aje kubashimira byihariye batangira guterera amafaranga hasi.

Kimenyi wanatowe nk’umukinnyi w’umukino, yavuye muri 11 (umuryango wa Stade Amahoro) kugeza muri 17 atoragura amafaranga yahabwaga n’abafana ba Rayon Sports, igikapu yayashyiragamo kiruzura.

Uyu munyezamu wagaragazaga akanyamuneza ku maso, yamaze kuyakusanya arabashimira akomeza agana mu rwambariro, asanga bagenzi be.

Bamuhereje amafranga igikapu kiruzura

Uyu munyezamu usanzwe unafatira Ikipe y’Igihugu ‘Amavubi’ ari mu bakunzwe muri Rayon Sports nyuma yo kuyigeramo muri Nyakanga 2019, avuye muri mukeba APR FC.

Igikorwa yakorewe n’abafana ba Rayon Sports cyaherukaga mu mwaka ushize w’imikino, ubwo bashimiraga Ulimwengu Jules nk’uko bajyaga babikorera Bokota Labama.

 

Tanga Igitekerezo ukoresheje Facebook

SHARE