KNC ngo akeneye Michael Sarpong muri Gasogi United bakamutetesha kurusha uko umubyeyi atetesha umwana we

Perezida wa Gasogi United, Kakoza Nkuriza Charles (KNC) yemeje ko mu Rwanda nta kipe itakwifuza rutahizamu w’Umunya-Ghana Michael Sarpong uherutse kwirukanwa na Rayon Sports ndetse ku bwe yemeza ko aje mu ikipe ye, yahatsindira ibitego byinshi atigeze atsinda.

Michael Sarpong w’imyaka 24, yirukanywe na Rayon Sports mu cyumweru gishize, ashinjwa amakosa atihanganirwa, aho yavuze ko umuyobozi wayo nta bushobozi afite bwo kuyiyobora.

Kakoza Nkuriza Charles (KNC) yemeje ko mu Rwanda nta kipe itakwifuza rutahizamu w’Umunya-Ghana Michael Sarpong

Nyiri Gasogi United, KNC, asanga uyu mukinnyi aramutse yerekeje muri iyi kipe, byaba byiza ku ruhande rwe kuko hari abakinnyi beza bashobora kumufasha gutsinda ibitego byinshi atigeze.

Ati “Sarpong ni umukinnyi mwiza nubwo wenda atagize amahirwe yo gutsinda igitego Gasogi United mu marushanwa, ntekereza ko Sarpong ni umukinnyi mwiza. Ntawe utazi akazi Sarpong atanga ku bakinnyi bugarira bose. Afite ubuhanga bw’umupira ku rwego rwo hejuru, aba afite ubushake mu kibuga, atanga ibyo afite byose kandi isaha n’isaha ari mu kibuga yagutsinda igitego.”

“Uwo mukinnyi rero aje muri Gasogi, nta byiza nka byo, akaza akiyongera ku bandi nka ba Berrian [Herron], ba Manasseh [Mutatu], Ndikumana [Trèsor],..(..) ya kipe y’abana ikina neza, Sarpong ashobora kwica abantu, ahubwo ashobora gutsinda ibitego atigeze abona mu buzima bwe.”

KNC yakomeje agira ati “Sarpong aje muri Gasogi, yaba ahuye n’abantu bazima, beza.”

Uyu muyobozi yavuze ko “Nta muntu utakwifuza Sarpong. Aje muri Gasogi United yaba aje mu muryango, mbere na mbere bamutetesha, akumva urukundo icyo aricyo. Twe ntabwo twamutererana mu bihe bikomeye.”

KNC yasabye Michael Sarpong ko niba yifuza kujya mu ikipe imufata nk’umwana mu muryango, nta yindi yatekereza uretse Gasogi United.

Ati “Muvandimwe Sarpong, mbigenje neza ukaza i Gasogi, njye ndabikubwira nka Perezida wa Gasogi United, Sarpong wabona ibintu utigeze ubona mu buzima bwawe. Yego ntabwo navuga ngo bagukunda urukundo ruruta urwo umubyeyi wawe agukunda, ariko rwaba rwegereye urukundo ruramba nk’impuhwe z’ababyeyi.”

Michael Sarpong wabaye umukinnyi w’umwaka w’imikino wa 2018/19 muri Rayon Sports, yatsinze ibitego 16 mu mwaka ushize mu gihe kuri ubu yari amaze kugeza ibitego birindwi mu mwaka w’imikino wa 2019/20.

Tanga Igitekerezo ukoresheje Facebook

SHARE