KNC yatunguwe n’akayabo ka miliyoni 99 Kwizera Olivier arikwishyuza Gasogi United yakiniraga

Umunyezamu Kwizera Olivier wamaze gusinyira Rayon Sports, yandikiye Gasogi United yakiniraga, ayishyuza miliyoni 99 Frw zasigaye ku mafaranga bumvikanye kugira ngo yongere amasezerano, ni inkuru yatunguye umuyobozi w’iyi kipe, Kakooza Nkuriza Charles (KNC).

Ku wa Gatatu nibwo Kwizera Olivier yasinye umwaka umwe muri Rayon Sports kuri miliyoni 8 Frw azavamo miliyoni 1 Frw izasubizwa Gasogi United, ariko bigirwa ibanga.

Uyu munyezamu usanzwe uhamagarwa mu Ikipe y’Igihugu ‘Amavubi’, yari yarumvikanye na Gasogi United kongera amasezerano y’umwaka umwe ndetse aba ahawe miliyoni 1 Frw.

Umunyezamu Kwizera Olivier wamaze gusinyira Rayon Sports, yandikiye Gasogi United yakiniraga, ayishyuza miliyoni 99 Frw

Nk’uko bigaragara mu ibaruwa yandikiye iyi kipe ku wa 1 Nyakanga, Kwizera Olivier uhagarariwe na Me. Kamanzi M. Assumpta, yasabye amafaranga yasigaye muri miliyoni 100 Frw yemerewe.

Ati “Nejejwe no kubandikira kugira ngo mbasabe kunyishyura amafaranga ya recruitement nk’uko twabyumvikanye.”

“Nk’uko twabyumvikanye, twemeranyijwe ko nzishyurwa na Gasogi United miliyoni 100 Frw ya recruitement kugira ngo nzabakinire mu mwaka w’imikino wa 2020/21, mukaba mwaranyishyuye miliyoni 1 Frw mu gihe cya COVID-19, akaba ariyo mpamvu mbandikiye mbasaba ko munyishyura miliyoni 99 Frw asigaye kugira ngo dusinye amasezerano.”

“Mboneyeho kubaha amasaha 48 yo kuba munyishyuye ayo mafaranga bitaba ibyo nkishakira ahandi nerekeza.”

Mu kiganiro n’abanyamakuru cyabaye kuri uyu wa Kane, Umuyobozi wa Gasogi United, Kakooza Nkuriza Charles (KNC), yavuze ko ibaruwa yanditswe na Kwizera Olivier yoroheje ikibazo bafitanye.

Ati “Birambabaje. Binyereka imitekerereze y’abakinnyi bacu uko imeze. Kwandika iriya baruwa bigaragaza ko yashatse kutwambura ku bushake.”

“Ndaza kubibasangiza, twumvikanye ibintu byinshi. Ibaruwa yanditse kuri twe yadufashije. Byatweretse ko ari ikintu yari yagambiriye, tubirekere umunyamategeko wacu. Yirengagije ko muri ibi bihe hari ikoranabuhanga.”

“Ibyo twumvikanye twari twabyumvikanye. Kandi yari yabyemeye. Sinzi niba azabihakana, ariko kuba yanditse kiriya kintu, yatworohereje ikirego.”

Mu majwi yashyizwe hanze, KNC aganira na Kwizera Olivier, humvikanamo ko impande zombi zari zumvikanye miliyoni 8 Frw n’umushahara w’ibihumbi 800 Frw ariko uyu mukinnyi akavuga ko hari abari kumuha ibiruta ibyo yahawe na Gasogi United.

Agaruka kuri Mbedi Manace Mutatu, na we bivugwa ko yifuzwa na Rayon Sorts, KNC yavuze ko nta mukinnyi ufungiye muri Gasogi United, ariko ushaka kuyivamo hari ibyubahirizwa kugira ngo ayisohokemo.

Ati “Nta mukinnyi n’umwe uri muri Gasogi United utazavamo, icyangombwa ni gute? Reka nkubwire ko Manace afite amasezerano atamwemerera kujya mu yindi kipe itabanje kuza kutureba. “

“Manace ni umukinnyi ushobora kujya mu yindi kipe mu gihe ibisabwa byose byubahirijwe.”

Tanga Igitekerezo ukoresheje Facebook

SHARE