Komite yose ya Rayon Sports yari iyobowe na Munyakaz Sadate yegujwe, Rayon ifite amadeni arenga miliyoni 800, kuri konte hariho ibihumbi 200 Frw

Ubuyobozi bw’Urwego rw’Igihugu rw’Imiyoborere RGB buratangaza ko bwahagaritse Komite yose ya Rayon Sports yari iyobowe na Munyakaz Sadate wari umaze igihe kinini yotswa igitutu n’abakunzi b’iyi kipe bamusaba kwegura.

RGB yagiranye ikiganiro n’abanyamakuru kuri uyu wa Kabiri, ivuga kandi ko yahaye Umuryango wa Rayon Sports iminsi 30 yo kuba bakemuye ibibazo bimaze iminsi biri muri iyi kipe, batabibonera igisubizo, Umuryango wa Rayon Sports ugahagarikwa by’agateganyo.

Iki kiganiro cyagaragaje ibyavuye mu isesengura ku ikipe ya Rayon Sports imaze iminsi mu biganiro by’abakunzi ba ruhago mu Rwanda by’umwihariko ab’iyi kipe.

Munyakaz Sadate

RGB ivuga ko  umuryango wa Rayon Sports waranzwe n’imikorere itubahiriza Itegeko rigenga imiryango nyarwanda itari iya Leta, kudahuza n’amategeko, gutera urujijo ku banyamuryango, imicungire mibi n’inyerezwa ry’umutungo

Uru rwego rwagaragaje imyanzuro yafashwe muri ririya sesengura ryize mu nguni zose z’ibibazo byinshi bivugwa muri iriya kipe.

  1. GB yihanangirije Umuryango Rayon Sport Association kuko wateshutse ku nshingano;
  2. Komite Nyobozi y’Umuryango iriho irahagaritswe kuko itabashije gusoza inshingano yahawe mu gukemura ibibazo by’umuryango.
  3. Mu rwego rwo kubungabunga ibikorwa by’umuryango, ibikorwa bya Rayon Sport biraragizwa mu buryo bw’agateganyo Komite y’inzibacyuho.
  4. Ihererekanya bubasha hagati ya Komite yari isanzwe iriho na Komite y’Inzibacyuho rizakorwa bitarenze taliki ya 24/09/2020. Abazayobora iyi nzibacyuho bazamenyekana mbere y’iherekanya bubasha.
  5. Mu gihe Rayon Sport izaba itabashije gekemura ibibazo dushingiyeho tubihanangiriza mu gihe cy’ukwezi (iminsi 30), hazakurikizwa ibiteganywa n’ingingo ya 32 y’itegeko rigenga imiryango nyarwanda itari iya leta biteganya ihagarikwa ry’agateganyo ry’umuryango.

Umuyobozi Mukuru w’Urwego rw’Igihugu rw’Imiyoborere (RGB) Dr Usta Kaitesi yavuze ko tariki 14 Gicurasi 2020 bakiriye ibaruwa ya Ngarambe Charles avuga ko ari we muyobozi w’Umuryango wa Rayon Sports.

Ngo icyo gihe Ngarambe Charles yababwiye ko mu minsi ya vuba bazabona abantu biyitirira iyi kipe. Ntibyatinze kuko nyuma y’iminsi itanu ubuyobozi bwa Rayon Sports buhagarariwe na Sadate Munyakazi na bwo bwahise bwandikira uru rwego bwerekana ko ari bwo bwemewe.

Ibi ngo ni byo byatumye RGB isanga muri Rayon Sports harimo ibibazo by’amategeko gusa bemeza ko komite ya Munyakazi Sadate ari yo ikwiye kuyobora umuryango.

RGB ivuga ko tariki ya 29 Gicurasi 2020 uru rwego rwemeza ko iyi komite ari yo yemewe ndetse runayiha inshingano zo gukora amategeko anoze, uburyo inzego zubakitse ndetse n’uburyo bwo kunoza imicungire y’umutungo w’umuryango. Dr Usta Kaitesi avuga ko izi nshingano zahawe iriya komite zitigeze zubahirizwa.

Ubuyobozi bwa RGB buvuga ko bwasanze Rayon Sports ifite amazina abiri, ikaba ifite ibyicaro bine ndetse n’ibirangantego birenze kimwe kandi byose bikaba byaragiye bitangazwa ko byemewe n’amategeko aho byagiye bihinduka bitewe n’umuyobozi uyiyoboye.

Ngo banasanze imikoreshereze y’amafaranga iteye inkeke kuko nta mpapuro na zimwe zerekana uburyo yaba ayinjiye n’ayasohotse yagiye akoreshwa.

RGB ivuga ko Rayon Sports ubu ifite amadeni arenga miliyoni 800 arimo miliyoni 200 zaje ku buyobozi bwa Munyakazi Sadate ndetse ngo ubu kuri konti zose za Rayon Sports hariho ibihumbi 200 Frw.

RGB ivuga ko ubwo Sadate Munyakazi yatorwaga kuri konti za Rayon Sports na bwo hariho ibihumbi 10 by’amafaranga y’u Rwanda.

Tanga Igitekerezo ukoresheje Facebook

SHARE