Leta y’u Burundi yafatiye ibihano abanyeshuri 96 bishwanyagurijeho imyenda y’ishuri ubwo bari mu byishimo ko basoje ayisumbuye

Leta y’u Burundi yafatiye ibihano abanyeshuri 96 bishwanyagurijeho imyenda y’ishuri ubwo bari mu byishimo ko basoje ayisumbuye, none ubu bakaba bagomba kubanza gucishwa mu kigo ngororamuco mbere yo guhabwa impamyabumenyi zabo.

Amafoto y’aba banyeshuri yakwirakwijwe ku mbuga nkoranyambaga muri Kanama uyu mwaka bamwe bari ku mazi aho bari mu munezero ko basoje amashuri yisumbuye, bityo imyenda y’ishuri biganaga bayishwanyagurizaho.

Ubwo basozaga ayisumbuye aba banyeshuri baciye imyambaro yabo y’ishuri

Ni ibintu bamwe bagiye bagaya ko aba bana bagaragaje uburere buke bakuye mu ishuri, banasaba ko babanza gucishwa mu kigo ngororamuco mbere yo kujya mu buzima busanzwe.

Biganjemo abo mu kigo EPM Buganza, abatangije icyo gikorwa kigayitse bakaba barimo Ndayikengurukiye Innocent, Ndizeye Bienvenu, na Nizigama Enock ndetse umwe muribo ngo akaba yarabikoreye muri salle nyuma gato yo gutanga impapuro za nyuma yari yakoreyeho ikizamini.

Ikinyamakuru Iwacu gitangaza ko iperereza ryakozwe na Minisiteri y’Uburezi mu Burundi rigaragaza ko ari abanyeshuri 96 barebwa n’iyi myitwarire, bakaba barafatiwe ibihano birimo kubanza kunyuzwa mu kigo ngororamuco.

Mu itangazo ryashyizweho umukono na Minisitiri w’Uburezi mu Burundi, Janvière Ndirahisha, agira ati “Nyuma y’iperereza ryakozwe na Minisiteri y’Uburezi, ni abanyeshuri 95 barimo 93 bo mu mujyi wa Bujumbura na 3 bo mu Ntara ya Bubanza bishwanyagurijeho iniforume”.

Muri iri tangazo, Minisiteri y’Uburezi itangaza ko abazaba batsinze bazahabwa impamyabumenyi zabo ariko na none babanje kugororwa, cyangwa se guhabwa amahugurwa arebana no gukunda igihugu.

Ibi bikorwa ngo bigaragaza uburere buke bahawe n’ababyeyi babo ndetse n’ibigo bizeho, uku kugororwa bagiye kubanza kujyanwamo ngo kukaba gutandukanye n’igifungo.

Aba banyeshuri bibukijwe ko kurangiza amashuri yisumbuye bitavuze ko babonye akanya ko gutangira uburara. Uruhare rw’ababyeyi n’abarezi ngo rukaba rukenewe.

Tanga Igitekerezo ukoresheje Facebook

TURAKWAMAMARIZA Niba uri umucuruzi, umushoramari, Umuhanzi n'abandi bantu bose bifuza kwamamaza, IBYAMAMARE.com turagufasha kwamamaza ibikorwa byawe bigere kubatuye isi yose kuko dusurwa n'abarenga miliyoni 2 buri kwezi, tugukorera inkuru, tukakwamamaza kumbuga nkoranyamba zacu zose harimo facebook, instagram, twiter na Youtube kandi bigakobwa gatatu mu Cyumweru ukwezi kose twamamaza ibyo ukora ndetse dushishikariza abantu kubimenya. DUHAMAGARE cyangwa utwandikire KURI Wats APP: +250 7830 35616 Cg utwandikire kuri Email : ibyamamarenews@gmail.com
SHARE