Leta y’u Rwanda n’iya Qatar byashyize umukono ku masezerano y’ubufatanye mu korohereza ubucuruzi hagati y’ibihugu byombi

Kuri uyu wa Mbere tariki ya 8 Gashyantare 2021, Leta y’u Rwanda yasinyanye amasezerano na Leta ya Qatar ajyanye no kwirinda gusoresha inshuro ebyiri ibicuruzwa bihererekanywa hagati y’ibihugu byombi ndetse n’ubufatanye mu kwirinda kunyereza imisoro.

Amasezerano yasinyiwe i Doha ku cyicaro gikuru cy’Ikigo cya Qatar gishinzwe imisoro (General Tax Authority/GTA), aho u Rwanda rwari ruhagarariwe n’Ambasaderi warwo muri icyo Gihugu François Nkulikiyimfura, mu gihe Qatar yari ihagarariwe n’Umuyobozi wa GTA Ahmed bin Issa al-Mohannadi.

Leta y’u Rwanda yasinyanye amasezerano na Leta ya Qatar ajyanye no kwirinda gusoresha inshuro ebyiri ibicuruzwa bihererekanywa hagati y’ibihugu byombi ndetse n’ubufatanye mu kwirinda kunyereza imisoro.

Isinywa ry’ayo masezerano ryanitabiriwe n’Umuyobozi Mukuru w’Ishami rishinzwe Umubano w’Afurika muri Minisiteri y’Ububanyi n’Amahanga ya Qatar, Abdulrahman bin Mohamed al-Dosari.

Abayobozi bitabiriye uwo muhango bagaragaje ko ayo masezerano ari indi ntambwe yiyongeye ku mubano mwiza mu by’ubukungu na dipolomasi ukomeje kwaguka hagati y’u Rwanda na Qatar.

Ayo masezerano agamije gukuraho ibyo gusoresha ibicuruzwa kenshi hagati y’ibihugu byombi, gukemura imbogamizi zose zishobora kubangamira ubuhahirane n’ubucuruzi by’umwihariko; agamije kandi kongera amahirwe y’ishoramari mu bihugu byombi haba ku mahirwe areba ibigo binini cyangwa abashoramari ku giti cyabo.

Ayo masezerano nanone kandi yitezweho gushyigikira imikoranire yubahiriza amabwiriza mpuzamahanga mu birebana no gukorera mu mucyo binyuze mu guhanahana amakuru ku bijyanye n’imari.

Ayo masezerano arimo ingingo zisobanura neza imikoranire y’u Rwanda na Qatar mu bwikorezi bwo mu kirere n’amazi, imikoranire y’ibigo bikomeye mu bihugu byombi, inyungu buri gihugu gifite mu mikoranire, byose bigamije gushyigikira imibanire y’ibyo bihugu mu by’ubukungu.

Ambasaderi Nkulikiyimfura yatangaje ko yishimiye gusinya ayo masezerano asobanuye ikintu gikomeye cyane ku buhahirane bw’u Rwanda na Qatar mu by’ubukungu. Yagize ati: “Aya masezerano agamije gushimangira umubano no kureshya abashoramari.”

Ibitangazamakuru byo muri Qatar biravuga ko u Rwanda ruje rwiyongera ku mubare munini w’ibindi bihugu byasinyanye amasezerano nk’ayo n’icyo Gihugu, ahanini akaba ari ibihugu bifitanye umubano w’akadasohoka.

U Rwanda na Qatar bisangiye indangagaciro zirimo iyo guharanira kwigira no kureba kure, ari na yo mpamvu umubano w’ibihugu byombi umaze gushinga imizi mu buryo budasubirwaho.

Umubano hagati y’u Rwanda na Qatar si uwa none nubwo wiyongereyemo ikibatsi kuva mu mwaka wa 2018, ari na bwo watangiye kugaragaza ibimenyetso byo gushinga imizi kurushaho.

Ibi bishimangirwa n’ingendo z’Abakuru b’Ibihugu byombi, aho mu myaka 2 Perezida wa Repubulika Paul Kagame yagiriye uruzinduko i Doha inshuro 2 ndetse n’Umuyobozi w’Ikirenga (Emir) wa Qatar Sheikh Tamim Bin Hamad Al Thani na we akaba yarasuye u Rwanda inshuro 2 mu mwaka wa 2019.

Uruzinduko Perezida Kagame yagiriye muri Qatar mu Ugushyingo 2018 rwaharuye inzira y’imishinga ikomeye kuko icyo gihe hasinywe amasezerano atatu hagati y’ibihugu byombi, agamije kurushaho kuzamura umubano n’ubufatanye hagati y’ibi bihugu.

Arimo amasezerano mu bijyanye n’indege, guteza imbere no kurengera ishoramari n’ay’ubufatanye mu butwererane mu bijyanye n’ubukungu, ubucuruzi n’ikoranabuhanga.

Emir wa Qatar nawe yaje mu Rwanda bwa mbere muri Mata 2019,  Perezida Kagame amutembereza muri Pariki y’Igihugu y’Akagera mu gihe cy’imvura aho basuye ibyiza nyaburanga bitwikiriye imitaka.

Yahagarutse tariki 09 Ukuboza 2019 ubwo habaga umuhango wo gutanga ibihembo ku ndashyikirwa ku rwego rw’Isi mu kurwanya ruswa (the International Anti-Corruption Excellence Awards).

Kugeza ubu, u Rwanda na Afurika y’Epfo ni byo bihugu byo ku mugabane w’Afrika aho Qatar yakuriyeho Visa abaturage babyo, mu rwego rwo koroshya urujya n’uruza n’ubuhahirane.

Tanga Igitekerezo ukoresheje Facebook

SHARE