Mayor wa Rubavu ntavuga rumwe n’abacuruzi bavuga ko amasoko yubatse mu bice bibahombya

Bamwe mu bacuruzi bo mu karere ka Rubavu bagaragaza ko hari amasoko yagiye yubakwa nabi ndetse ngo akanubakwa mu bice bitegereye abakiriya bituma abiyemeje kuyakoreramo Babura abaguzi bagahomba mu gihe gito.Ubuyobozi bw’akarere bubitera utwatsi bugashinja abo bacuruzi gushaka gukorera mu kajagari.

Abo bacuruzi  bakomeje kugaragaza ko impamvu nyamukuru amwe mu masoko yo mu karere ka Rubavu atitabirwa cyane biterwa ahanini n’uburyo yubatse,aho bashimangira ko yagiye yubakwa mu buryo bugora abaguzi n’abagurisha bikabakururira ibihombo no gufunga ubucuruzi bwabo.

Nka bamwe mu bacuruzi bacururiza mw’isoko rya Karukogo bakuwe murya Mbugangali bavuga ko batakibona abaguzi bitewe n’uko iri soko riri kure y’abaguzi biganjemo abaturuka muri Repubulika ya Demokarasi ya Congo bahamya ko ibyashara byagabanutse ku buryo bugaragara.

Uwitwa Mukeshimana Florence ucuruza inkoko mw’isoko rya Karukogo yagize ati :

“Twacururizaga mu isoko rya Mbugangari batwimurira hano mu isoko rya Karukogo kandi muby’ukuri abakiriya bacu 90% ari abakongomani, kubera ko iri soko ryubatswe kure rero byaduteje igihombo gikomeye,abakongomani twagurishaga ntago bagera hano kuko ni kure “

Yongeraho ko uwakoze inyigo y’iri soko yagombaga kuba yararyegereje abakiriya babo b’abakongomani cyangwa se akabarekera aho bakoreraga mbere mu isoko rya Mbugangari kuko abakiriya babo bari bamaze kurimenyera ariko kugera aha bimuriwe kuhagera bikaba bibagora.

Nkundabakiga Jean Paul Umuyobozi w’isoko rya Karukogo uvuga ko iri soko ritigeze ribura abakiriya ahubwo ari abacuruzi badashaka kuricururizamo bagahitamo gukomeza gukora mu kajagari bitwaje ko ari kure y’abaguzi babo.

“Iri soko ntakibazo cy’abakiriya rifite rwose kuko ibyo basangaga mu isoko rya Mbugangari byose byimukiye muri iri, ababikenera bose baza kubigurira hano. Abavuga ko batabona abakiriya muri iri soko ni bamwe baba badashaka impinduka.”

S’abacururiza ku Karukogo gusa bataka kuko nabo mw’isoko rya Rugerero bavuga ko iri soko uburyo ryubatswe n’iminsi rirema biri mu bidindiza abarikoreramo ku buryo bamwe bahitamo kurivamo bakajya gucururiza ku mihanda

Uyu yagize ati : ” Ntago wacururiza muri iri soko ngo utere imbere,rirema nyuma ya saa sita kandi nta baguzi babamo ku buryo wakoreramo ukabona imisoro,ay’ikibanza ndetse natunga imiryango niyo mpamvu abenshi bahitamo kujya gukorera mu kajagari. nibaza nk’uwakoze inyigo yirisoko niba nyuma yo kuzura kwaryo yari yahagera ngo arebe uko rirema”

Umuyobozi w’Akarere ka Rubavu Habyarimana Gilbert avuga ko umucuruzi n’umuguzi bahurira ku isoko akavuga ko abavuga ko iri soko riri ahantu habi ari abashaka kuguma mu bucuruzi bw’akajagari.

” Ntabwo nemeranya n’bavuga ko inyigo y’isoko ikorwa nabi  kuko umuguzi asanga umucuruzi w’ibyo akeneye. Abavuga ko inyigo z’amasoko atandukanye Akarere kubatse zagiye zikorwa nabi ni abadashaka gucika ku bucuruzi bw’akajagari wasangaga hirya no hino mu mujyi no mu nkengero zawo “

Gilbert Habyalimana uyobora akarere ka Rubavu  Aburira aba bacuruzi badashaka kuva mu kajagari ngo babyaze umusaruro ibikorwa remezo byabashyiriweho ahubwo ugasanga bigabiza imihanda n’ahandi hatemewe agashimangira ko umurongo Akarere kafashe ari ukutihanganira na gato ubucuruzi bw’Akajagari.

Akarere ka Rubavu kabarurwamo amasoko  18 harimo agera kuri  2 arimo irya Rugerero na Kabari yitabirwa ku kigero kiri hasi aho usanga abakabaye bayakoreramo bari ku muhanda hafi yayo ku mpamvu bavuga ko ari uko abakiriya batayinjiramo.

Mayor Habyalimana Gilbert ntavuga rumwe n’abacuruzi banga gukorera mu masoko bubakiwe bakishora mu bucuruzi bw’akajagari

Tanga Igitekerezo ukoresheje Facebook

SHARE