Meddy bamusibishije amashusho y’indirimbo yakoranye na Rayvanny n’umu Dj wa Diamond, bamusaba kubanza gukura akamenya uko akazi gakorwa

Umuhanzi w’umunyarwanda Ngabo Medard[Meddy] bamusibishije indirimbo yakoranye n’abahanzi bo muri Tanzania, Ray Vanny n’umu Dj wa Diamond, Romy Jones.

Indirimbo ya Meddy bise “We don’t care”yashyize kurubuga rwa youtube kuri uyu wa Kane taliki ya 20 Kanama 2020, ishyirwa kuri account ya Meddy ndetse atangira kuyamamaza kumbuga ze nkoranyambaga harimo na instagram asaba abakunzi be kuyireba kuri youtube, abakunzi b’uyu muhanzi baje gutungurwa kuko nyuma y’isaha imwe iyi ndirimbo yahise isibwa.

Mu ijoro ryo ku wa Mbere tariki 9 Ukuboza 2019 nibwo Ray Vanny yageze mu Rwanda aho yari ari muri gahunda zo kurangiza indirimbo yagomba gukorana na Meddy.

Iyi ndirimbo yagombaga kuba yaragiye hanze mu kwezi kwa Gashyantare 2020 gusa biza gutinda kuko hari ibyo umuhanzi Meddy atari yujuje.

Byagenze gute kugirango Ray Vanny akorane indirimbo na Meddy.

Meddy usanzwe utuye muri Leta Zunze Ubumwe za Amerika yageze muri Afurika muri Kanama 2019 ubwo yitabiraga igitaramo yakoreye muri Sychelles, ubwo yasozaga ibi bitaramo nibwo yagiye muri Tanzania agenda agiye gushaka umuhanzi Diamond Platnumz kugirango bakorane indirimbo, ageze muri Tanzania byaramugoye cyane kuko atabashije kumvikana na Daimond wamuciye arenga miliyoni 60 z’amafaranga y’u Rwanda kugirango bakorane indirimbo.

Romy Jones umu Dj wa Diamond niwe wari wahuje Diamond na Meddy

Meddy amaze kubona ko ibyo gukorana na Diamond byanze, yasabye uyu mu dj ko yamuhuza n’undi muhanzi wo muri Wasafi, icyogihe Meddy yahisemo Harmonize gusa uyu mu Dj abwira Meddy ko gukorana na Harmonize bishobora kugorana kuko icyogihe uyu muhanzi(Harmonize) ntabwo ibye na Wasafi byari byifashe neza muri iyo minsi.

Ubuyobozi bwa Wasafi, bigizwemo uruhare na Dj wa Diamond bwaje kemerera Meddy gukorana indirimbo na Rayvanny ariko bamusaba kwishura arenga miliyoni 20 z’amfaranga y’u Rwanda, Meddy yarabyemeye gusa avugako azatanga kimwe cya Kabiri miliyoni 10, andi akazayatanga ari uko iyi ndirimbo igiye hanze muri Gashyantare 2020.

Ray Vanny yaje mu Rwanda mu Ukuboza 2019, atangira gukorana na Meddy uyu mushinga w’indirimbo, amajwi atunganywa na Madbeat na Bob Pro ndetse bahita batangira gufata amashusho yayobowe na Meddy Saleh.

Iyi ndirimbo yagombaga kuba yarasohotse mu kwezi kwa Gashyantare 2020, igihe cyo kujya hanze cyarageze Meddy aryumaho yanga gutanga amafaranga yari yasigaye kuyo bumvikanye kugirango akorane na Ray Vanny.

Romys Jones

Uko iyi ndirimbo yageze muri Tanzania ivuye mu maboko y’abanyarwanda.

Ku Cyumweru taliki ya 16 Kanama 2020, Dj Romy Jones nibwo yagombaga gukora ibirori byo kwizihiza isabukuru y’amavuko, byari ibirori bidasanzwe kuko uyu mugabo yanaboneyeho kumurika album iriho indirimbo zitandukanye yagiye akorana n’abahanzi benshi bo muri Tanzania, kuri iyi album uyu mugabo yise “Changes” hari hariho n’indirimbo ya Meddy, harimo uyu mu Dj na Ray Vanny.

Kuko indirimbo zose zi kuri iyi album zagombaga kwerekanwa muri ibi birori, Meddy nawe yatanze iyi ndirimbo yakoranye n’aba bahanzi bo muri Wasafi, nayo iri mu ndirimbo zatambukijwe mu birori byanyuraga Live kuri televiziyo ya Wasafi TV mu kiganiro cyitwa Big Sunday Live kiyoborwa n’umunyamakuru Lil Ommy.

Ray Vanny

Meddy amaze kubona ko indirimbo ye yaciye kuri Televiziyo muri Tanzania nawe yahise ayishyira kuri youtube.

Amakuru ikinyamakuru Ibyamamare.com dukura mugihugu cya Tanzania, by’umwihariko mu kiganiro twagiranye na Ricardo Momo, umujyanama w’abahanzi muri Wasafi, badutangarijeko aribo bagize uruhare mu isibwa ry’indirimbo “We don’t care” kuko Meddy atigeze yubahiriza amasezerano bagiranye, harimo n’amafaranga yagombaga kubishyura kugirango iyi ndirimbo ijye hanze.

Ricardo yagize ati “Iyi ndirimbo yakozwe kera, imaze igihe, ariko na Meddy ubwe azi impamvu yari yaratinze kujya hanze, ni uko hari ibyo twumvikanye atigeze yuzuza, niyo mpamvu indirimbo twamusabye kuyikuraho…”

Uyu mugabo tumubajije icyo Meddy yasabwaga kugirango abakunzi be bemererwe kureba iyi ndirimbo yirinze kugira byinshi atangaza atubwirako twabaza Meddy kuko nawe abizi neza.

Twagerageje gushaka Meddy kugirango tumubaze ibivugwa kuri iyi n’indirimbo n’impamvu yayishyize kurubuga rwe rwa youtube nyuma igahita isibwa, mubutumwa bwose twamwandikiye ntiyigeze abusubiza, nagira icyo atangaza turakibatangariza mu nkuru yacu ikurikira.

 

Tanga Igitekerezo ukoresheje Facebook

SHARE

1 IGITEKEREZO

  1. Namwe ntimuramenya uko akazi gakorwa,
    muti “Indirimbo ya Meddy bise “We don’t care”yashyize kurubuga rwa youtube kuri uyu wa Kane taliki ya 20 Kanama 2020, ishyirwa kuri account ya Meddy ndetse atangira kuyamamaza kumbuga ze”

    Ese koko indirimbo ni iya Meddy nkuko mubivuga mu nkuru?