Menya akamaro ko kunywa umutobe wa Epinari

Epinari ziri mu mboga benshi barya ziri mu isombe nubwo no kuziteka bisanzwe ari nziza kandi ziryoha zikanaba zuzuye intungamubiri. Ni imboga burya rero ushobora no kurya ari mbisi, haba kuri salade, ukazikataguriraho cyangwa se ukaba wazinyuza ku muriro mu mavuta ukamera nk’uzibabura maze ugahita uzarura ukazirya.

Nyamara kandi hari ubundi buryo ushobora kwinjiza ibyiza byazo, ari byo kunywa umutobe wazo. Aha ufata epinari, noneho ugashyira mu kamashini kagenewe gusya imitobe, ukongeramo amazi macye ugasya cyangwa se ugasekura noneho ugasukamo amazi ukavanga ukayungurura ukanywa uwo mutobe.
Hano tugiye kurebera hamwe akamaro k’uyu mutobe

1. Gusukura umubiri

Muri epinari mbisi dusangamo ibisukura umubiri biwukuramo uburozi n’ibindi byatera indwara zinyuranye nka kanseri. Muri byo twavugamo lutein, beta carotene, coumaric acid, violaxanthin na ferulic acid.

Ubushakashatsi bukaba kandi bwarerekaye ko uyu mutobe urinda DNA kuba yakangirika.

2. Gufasha amaso

Harimo lutein na zeaxanthin ndetse na vitamini A ibi bikaba bikenewe kugirango ubashe kureba neza by’umwihariko bikaba birinda umubiri wawe ubuhumyi bwa nijoro cyangwa bumwe bushobora gufata abageze mu zabukuru.

3. Byagabanya ibyago bya kanseri

Nkuko twabibonye hejuru uyu mutobe ufasha mu gusohora imyanda mu mubiri kandi myinshi muri yo ni yo soko yo kurwara kanseri zinyuranye. Ndetse gufata uyu mutobe bifasha abari ku miti ya kanseri kutagerwaho n’ingaruka zabo bikabije. Uyu mutobe ukaba urinda ibyago bya kanseri y’amara, iya porositate, amabere n’ibihaha.

4. Kuringaniza umuvuduko w’amaraso

Muri uyu mutobe habonekamo nitrates z’umwimerere hamwe na potassium bikaba bizwiho gutuma imiyoboro y’amaraso yaguka bityo amaraso agatembera neza, ndetse no kugabanya igipimo cya sodium mu maraso, maze umuvuduko ukaringanira. Uretse ibi, uyu mutobe ku bagabo ni mwiza mbere yo gukora imibonano kuko utuma igitsina gifata umurego igihe kinini.

5. Kongera ubudahangarwa

Harimo kandi vitamini C, idakunze kuboneka iyo zitetswe kuko iba yangiritse ndetse na vitamini A, zose zikaba zigira uruhare mu kongerera ingufu ubudahangarwa bw’umubiri no kuwurinda kwibasirwa n’indwara zandura.

6. Gufasha ibisebe gukira

Uretse kuba yafasha ibisebe gukira inarinda kuva imyuna, irinda kuva amaraso menshi uri mu mihango kubera ikungahaye kuri vitamini K. gusa bivuze ko abafata imiti nka warfarin batemerewe gufata uyu mutobe, kuko ibikorwa n’iyi miti uyu mutobe wabiburizamo.

Tanga Igitekerezo ukoresheje Facebook

SHARE