Menya byinshi ku ndwara ya Vitiligo, abenshi babona umuntu uyirwaye bakamwita nyamabara

Vitiligo cg kuba nyamabara nkuko mu Kinyarwanda tuyita, ni indwara ikunze kwibasira uruhu, bivugwa igihe ku mubiri w’umuntu, ibice bitandukanye hagiye haza amabara akenshi yo kuba inzobe cyangwa umweru ntihase n’ahandi, bishobora gufata agace kanini cyangwa gatoya.

Ibi biba bivuze ko uturemangingo dushinzwe guha ibara uruhu rwacu ari two tuzwi nka melanocytes tuba twangiritse nuko aho hangiritse hagahindura ibara

Vitiligo iterwa n’iki?

Kugeza ubu impamvu nyamukuru itera vitiligo ntiramenyekana neza. Icyakora ubushakashatsi hari icyo bugenda bugaragaza;

Bishobora guterwa n’ubudahangarwa bw’umubiri bwibeshya nuko bukabona twa turemangingo nk’abanzi baje kwangiza uruhu nuko tukangizwa.
Birashoboka kandi ko utwo turemangingo dutanga ibara ry’uruhu natwo ubwatwo twakiyangiza.


Bishobora no kuba uruhererekane mu miryango

Hari n’abacyeka ko gutwikwa n’izuba ryinshi igihe kinini cyangwa kugira stress nyinshi bishobora kubitera. Gusa ibi byo nta bushakashatsi burabyemeza
Ni bande bibasirwa na vitiligo cyane?

Akenshi iyi ndwara ikunze gufata abantu bageze mu zabukuru, cyane cyane abarengeje imyaka 40. Gusa n’abari munsi yayo bashobora kuyirwara, dore ko n’umwana muto ushobora kuyimusangana.

Iyi ndwara kandi byagaragaye ko ikunze kwibasira abantu bafite ikibazo cy’imikorere mibi ya thyroid iba ikora kiu buryo burenze ubucyenewe (hyperthyroidism)

Ndetse inashobora kuba uruhererekane, aho mu gihe mu muryango harimo abayirwaye nawe uba ufite ibyago byinshi byo kuba wayirwara.

Iyi ndwara irangwa n’iki?

Kuri bamwe iyi ndwara ifata ahantu hanini cyane
Nkuko twabivuze tugitangira, iyi ndwara irangwa no kuzana amabara ku ruhu ahantu hanyuranye. Akenshi aya mabara akunze kuza ahantu hagerwa n’izuba vuba nko ku maboko, ku maguru, mu maso no ku munwa.

Icyakora hari ahandi aya mabara akunze kuza:

  • Ahazengurutse umunwa
  • Ku maso (ahazengurutse)
  • Imyenge y’izuru
  • Ku myanya ndangagitsina
  • N’ahazengurutse umwoyo

Ndetse uzasanga abafite iyi ndwara n’ubwoya buri aharwaye nabwo buhindura ibara, bukeruruka.

Nkuko twabivuze hejuru, hari igihe ahafashwe hatiyongera, bikaguma uko uretse ko hari n’igihe bigenda bikura, ugasanga byafashe ahantu hanini; cyane cyane ku bantu bakuze cyane.

Vitiligo ivurwa ite ?

Nubwo kugeza ubu iyi ndwara nta kiyitera kizwi, havurwa ibigaragara, nubwo nabyo kubivura 100% bitaragerwaho.

Kuvura ni ugutuma uruhu rwongera gusa neza aharwaye hagasa n’ahandi. Mu kuvura rero harebwa :

  • Ubwinshi bw’amabara
  • Ingano y’aho amabara ari
  • Icyo umurwayi yihitiyemo kuvurishwa

Imiti imwe n’imwe ntabwo iba myiza kuri bamwe kuko ishobora gutera izindi ngaruka mbi. Ikindi kandi imiti imwe bisaba kuyifata igihe kinini, ndetse rimwe na rimwe ntikore.

Mu miti itangwa harimo:

  • Imiti yo kwisiga isigwa ahari amabara
  • Imiti inyobwa
  • Uburyo buzwi nka PUVA (Plus Ultra Violet A)
  • Kubaga hagakurwaho ahari ibara hagasimbuzwa akandi gace kakuwe ahatarwaye, gusa
  • ibi bikorwa iyo ahari amabara ari hato
  • Kwitabaza ibyo kwisiga (make up) ku buryo usiga ahari amabara hagasa n’ahandi

Imwe mu miti yifashishwa

Ibi byose ugenda ugerageza ikizahura n’uruhu rwawe, niyo mpamvu usabwa kutarambirwa kuko kuvura bishobora no gutwara imyaka myinshi.

Gusa nubwo twakomeje kubyita indwara mu by’ukuri si uburwayi bwatera ikibazo buramutse butavuwe, nuko gusa bitera ipfunwe rimwe na rimwe kuba umuntu afite amabara adasa ku mubiri we naho ubundi iyo ushoboye kwiyakira, imiti si ngombwa, gusa usabwa kurinda ko izuba ryagera buri gihe ahafashwe, kuko rishobora gutuma hiyongera.

Tanga Igitekerezo ukoresheje Facebook

SHARE