Minisitiri w’Intebe w’u Bwongereza, Boris Johnson, yahishuye uburyo yafashijwe gukira Coronavirus

Minisitiri w’Intebe w’u Bwongereza, Boris Johnson, yahishuye uburyo yafashijwe gukira COVID-19 nyuma yo gushyirwa mu bitaro arembye bikaba ngombwa ko ahabwa umwuka.

Mu kiganiro yagiranye na The Sun kuri iki Cyumweru, Boris yavuze ko ubwo yari mu bitaro, yakenereraga “litiro nyinshi z’umwuka wa oxygène” kugira ngo akomeze guhumeka.

Minister Boris Johnson

Icyumweru yamaze mu bitaro byitiriwe Mutagatifu Thomas i Londres, ngo cyamuremyemo imbaraga n’ubushake bwo gukora ibishoboka byose ngo ntihagire undi muntu wandura iyi ndwara.

Mu ntangiriro z’iki Cyumweru, Umukunzi we Carrie Symonds, yahishuye ko umwana wabo baherutse kwibaruka bamwise amazina bashingiye no ku baganga babiri bavuraga se.

Boris yavuze ko yashyizwe ku mashini imwongerera umwuka ariko ibipimo bigakomeza kwerekana ko ubuzima bwe butameze neza.

Yavuze ko “byari ibihe bigoye rwose sinabihakana” ku buryo ngo yakomezaga kwibaza ati “ni gute nzakira?”.

Boris yasanganywe Coronavirus tariki ya 26 Werurwe, nyuma y’iminsi icumi ahita ashyirwa mu bitaro, akigezwamo yashyizwe mu cyumba gifashirizwamo abantu barembye cyane.

Tanga Igitekerezo ukoresheje Facebook

SHARE