Mu mafoto reba uko byari byifashe mu birori byo gutora Miss Supranational Rwanda 2019

0
1087

Mu ijoro ryo kuri iki Cyumweru tariki ya 8 Nzeri 2019 nibwo muri Kigali Serena Hotel habereye ibirori byanyuma byo gutoranya umukobwa wagombaga kwambikwa ikamba rya Miss Supranational Rwanda, ryaje kwegukanwa na Umunyana Shanitah.

Abakobwa 15 bari bamaze iminsi mu mwiherero w’iri rushanwa bagombaga gutoranywamo umwe wegukana ikamba.

Muri ibi birori bisoza irushanwa aba bakobwa bose babanje kwiyerekana mu mwambaro wa Kinyarwanda, bakurikizaho kwiyerekana mu myambaro ya Made in Rwanda ari nako buri wese yivuga, akavuga n’indoto ze, imbere y’akanama nkemurampaka.

Aba bakobwa bongeye kwiyerekana mu buryo bwari bukozwe bwa mbere mu marushanw y’ubwiza abera mu Rwanda, aho bari bambaye ingofero, amakote, imipira, amakabutura n’inkweto za siporo, maze babyina indirimbo ya Beyoncé yitwa ‘Run the World’.

Babikoze hagamijwe kugaragaza ko ntacyo batakora, maze buri wese atambuka uko abishoboye; hari abateraga amasaluti (salute) abandi bagatambuka muri iyi ndirimbo mu buryo bw’abamurika imideli.

Kimwe mu byanyuze benshi muri ibi birori ni umwambaro wa bikini ya Made in Rwanda abakobwa biyerekanyemo utandukanye n’indi isanzwe imenyerewe mu marushanwa atandukanye ku Isi.

Icyiciro cyanyuma cyo kwiyerekana kwaba bakobwa biyerekanye mu makanzu meza maremare, babyina indirimbo ya Alyn Sano yitwa ‘Naremewe Wowe’ ari nako uyu muhanzi abafasha kuyibyina.

Nyuma yo kwiyerekana akana nkemurampaka kari kagizwe na Akiwacu Colombe wabaye Miss Rwanda 2014, Christella Mucyo uri mu bategura iki gikorwa, Sunday Justin na Isimbi Sabrina waserukiye u Rwanda muri aya marushanwa mu 2012, batoranyije abakobwa 5 bahize abandi barongera babazwa ibibazo maze batoranywamo uwegukana ikamba wabaye Umunyana Shanitah.

Umunyana Shanitah wabaye Miss Sipranational Rwanda 2019 yari asanzwe afite ikamba ry’igisonga cya mbere cya Miss Rwanda 2018. Yahembwe Miliyoni 1 Frw, azanaserukira u Rwanda mu irushanwa rya Miss Supranational rizabera muri Pologne mu Ukuboza 2019.

Igisonga cya kane yabaye Magambo Yvette; Igisonga cya Gatatu aba Umufite Anipha; Igisonga cya kabiri yabaye Umwali Sandrine naho Igisonga cya mbere aba Umutoniwase Anastasie. Igisonga cya Mbere yegukanye 500,000 Frw mu gihe Igisonga cya kabiri yahembwe 300,000 Frw abandi barashimirwa.

Abakobwa biyerekana muri bikini za Made in Rwanda.

Biyerekana mu makanzu.

Alyn Sano wasusurukije ibi birori yafashaga aba bakobwa gutambuka mu ndirimbo ye ‘Naremewe Wowe’.
Abakobwa batanu bageze mu cyiciro cya nyuma.
Shanitah na Anastasie nibo batowe uwegukana ikamba undi aba Igisonga cya mbere.

 

AMAFOTO: Muhizi Serge

SHARE