Mu masaha make Social Mula araba yibarutse imfura ye mu rugendo rwa muzika

Mugwaneza Lambert wamamaye mu muziki nka Social Mula n’umwe mu bahanzi beza mu njyana ya RnB u Rwanda rufite. Nyuma y’urugendo rw’imyaka 7 amaze muri muzika, kuri uyu wa Gatandatu tariki ya 23 Ugushyingo nibwo aramurika album ye ya  mbere mu gitaramo cy’imbaturamugabo.

Iyi album igereranywa n’umwana w’imfura kuri Social Mula yayitiriye indirimbo ye ‘Ma Vie’ iri muzakunzwe cyane dore ko imaze kurebwa n’abarenga miliyoni 2 ku rubuga rwa Youtube.

Uyu muhanzi kuri uyu wa Kane yabwiye itangazamakuru ko akurikije igihe amaze mu muziki yari yaratinze kumurika album ashingiye ku bikorwa bitandukanye by’umuziki yagiye akora kandi bigakundwa mu buryo bukomeye.

Akomeza avuga ko umuhanzi wese utagira Album biba bisa nabi ku ruhando mpuzamahanga, Ma Vie album agiye gushyira hanze ikazaba igizwe n’indirimbo 18.

Social Mula wari mu bahataniye igihembo cya Prix Decouvertes 2019 nubwo atagize amahirwe yo kucyegukana, yemereye itangazamakuru ko imyiteguro yose y’iki gitaramo yarangiye kandi yagenze neza. Yizeza abakunzi be kuzabakorera igitaramo kizabanyura.

Muri iki gitaramo kizabera Camp Kigali mu ihema guhera saa kumi n’ebyiri z’umugoroba, uyu muhanzi azafashwa na bagenzi be bafite amazika akomeye hano mu Rwanda no mu karere nka Big Fizzo wo mu Burundi, King James, Yvan Buravan, Yverry, Marina n’abandi.

Kwinjira ni 5000Frw mu myanya isanzwe, 10,000Frw mu myanya y’icyubahiro na 150,000Frw ku meza y’abantu 8 bari kumwe.

Urupapuro rwamamaza iki gitaramo.

Reba hano indirimbo ‘Ma Vie’ yitiriye album ye ya mbere

 

Tanga Igitekerezo ukoresheje Facebook

SHARE