Mu mujyi wa Kigali: ba Meya b’uturere bose bakuweho

Ubusanzwe umujyi wa Kigali ugizwe n’uturere dutatu twayoborwaga na ba Meya, kuri ubu aba bayobozi bose bakuweho hakorwa impinduka mu miterere n’inshingano z’inzego z’ubuyobozi mu rwego rwo kunoza imicungire n’iterambere ry’Umujyi.

Izi mpinduka zabaye hashingiwe ku itegeko Nº 22/2019 ryo ku wa 29/07/2019 ryasohoka mu Igazeti ya Leta n° idasanzwe yo ku wa 31/07/2019, rigenga Umujyi wa Kigali riherutse kuvugururwa.

Iri tegeko rivuga ko uturere two mu mujyi wa Kigali nta buzima gatozi tugifite, mu micungire y’imari n’abakozi, ahubwo abakozi bakorera mu Turere, Imirenge n’Utugari bakaba ari ab’Umujyi wa Kigali, ari na wo ugenera izo nzego ingengo y’imari yo gukoresha.

Rivuga kandi ko ibyemezo byose biyobora Kigali bizajya bifatirwa ku rwego rw’Umujyi, aho gufatwa n’inzego zitandukanye ziri ku rwego rw’Akarere n’Umujyi icyarimwe nk’uko byakorwaga.

Iri tegeko kandi rikuraho Inama Njyanama z’uturere rikanavuga ko Akarere kazajya kayoborwa n’Urwego nshingwabikorwa rugizwe n’Umuyobozi Nshingwabikorwa w’Akarere ndetse n’Umuyobozi Nshingwabikorwa w’Akarere Wungirije, bashyirwaho n’Iteka rya Minisitiri w’Intebe.

Ryahinduye inyito n’inshingano z’abayobozi bungirije b’Umujyi wa Kigali n’Urwego nshingwabikorwa rw’Umujyi wa Kigali rukazajya ruyoborwa n’Umuyobozi w’Ibikorwa by’Umujyi (City Manager).

Nk’uko bigaragara mu itangazo ry’ibiro bya Minisitiri w’Intebe, abayobozi bashya bashyizweho mu nzego z’umujyi wa Kigali n’uturere tuwugize mu buryo bukurikira:

-Madamu Rugaza Julian : Umuyobozi Mukuru w’Ibikorwa by’Umujyi (City Manager).

-Bwana Asaba Katabarwa Emmanuel : Umuyobozi Mukuru ushinzwe Imyubakire n’Imitunganyirize y’Umujyi (City Engineer).

-Bwana Niyongabo Joseph: Umuyobozi Mukuru w’Imirimo Rusange (Director General of Corporate Services).

-Muhirwa Marie Solange: Umuyobozi Mukuru Ushinzwe Igenamigambi ry’Imiturire n’Imitunganyirize y’Umujyi (Chief of Urban Planning).

-Bwana Rubangutsangabo Jean: Umuyobozi Mukuru Ushinzwe Iterambere ry’Ubukungu ry’Umujyi (Urban Economist).

MU KARERE KA GASABO:

-Madamu Umwali Pauline: Umuyobozi Nshingwabikorwa w’Akarere (District Executive Administrator).

-Bwana Mudaheranwa Regis: Umuyobozi Nshingwabikorwa w’Akarere Wungirije (Deputy District Executive Administrator).

MU KARERE KA KICUKIRO:

-Madamu Umutesi Solange: Umuyobozi Nshingwabikorwa w’Akarere (District Executive Administrator).

-Bwana Rukebanuka Adalbert: Umuyobozi Nshingwabikorwa w’Akarere Wungirije (Deputy District Executive Administrator).

MU KARERE KA NYARUGENGE:

-Bwana Ngabonziza Emmy: Umuyobozi Nshingwabikorwa w’Akarere (District Executive Administrator).

-Madamu Nshutiraguma Esperance :Umuyobozi Nshingwabikorwa w’Akarere Wungirije (Deputy District Executive Administrator).

 

Tanga Igitekerezo ukoresheje Facebook

SHARE

1 IGITEKEREZO