Mu myaka 21 Google iyoboye abakoresha internet ku isi

Ku itariki nk’iyi z’ukwa cyenda mu 1998 nibwo kompanyi ya Google yandikishijwe nka kompanyi yigenga muri Leta ya California, USA. Hari kuwa gatanu.

Yari yaratangiye mu kwezi kwa mbere mu 1996 igeragezwa nk’umushinga w’abanyeshuri Larry Page na Sergey Brin bakoraga PhD muri kaminuza ya Stanford aho muri California.

Google ni ishakiro rya buri kintu cyose kuri Internet, izina ryayo ubundi rikomoka ku kwandika nabi ijabi “googol” iri risobanura umubare wa 1 ukurikiwe n’amazero 100.

Kompanyi ya Google yarakuze vuba cyane kubera kwaguka kwa Internet no kuba abantu bayishakaho byinshi bayibajije.

Ubu itanga serivisi zindi nyinshi nka; Google Docs, Google Sheets, Gmail, Google Calendar, Google Drive, Hangouts, Google Translate, Google Maps, YouTube, Google Photos, Android, Google Chrome…

Yungukira mu bucuruzi bwa Internet, softwares za mudasobwa, mudasobwa, artificial intelligence ndetse no kwamamaza. Ifite abakozi 103,459. Mu mwaka ushize yinjije miliyari $136.

Kugeza ubu Google nirwo rubuga rusurwa n’abantu benshi ku isi.

Iyi kompanyi ariko inengwa cyane kwinjira mu buzima bwite bwa rubanda, kunyereza imisoro, kutizerwa, kubuza abantu kubona ibyo bakeneye byose n’ibindi…

Google iri muri kompanyi enye zikomeye cyane ku isi mu ikoranabuhanga iruhande rwa; Amazon, Apple na Facebook.

Kugeza mu 2017, Google niyo yari ‘brand’ y’agaciro kanini ku isi hose.

Tanga Igitekerezo ukoresheje Facebook

SHARE