Mu Rwanda abarwaye Coronavirus bakomeje kwiyongera, bageze kuri 19

Minisiteri y’Ubuzima yatangaje ko kuri iki cyumweru tariki 22 Werurwe 2020 hagaragaye abandi bantu babiri barwaye Coronavirus, biyongera ku bandi 17 bose hamwe bahita bagera kuri 19.

Mu itangazo iyi Minisiteri yashyize hanze ku mugoroba wo kuri iki Cyumweru tariki ya 22 Werurwe 2020, ivuga ko abarwayi bashya bagaragaweho Coronavirus ni ‘Umugabo w’Umunyarwanda w’imyaka 32 wageze mu Rwanda ku itariki ya 19 Werurwe 2020’.

Undi ni ‘Umugabo w’Umunyarwanda w’imyaka 32 wageze mu Rwanda ku itariki ya 20 Werurwe 2020 aturutse i Dubai’.

Aba barwayi bose bari kuvurirwa ahantu habugenewe ari nako hashakishishwa abantu bose bahuye nabo kugira ngo nabo basuzumwe ndetse bitabweho n’inzego z’ubuzima.

Kuri uyu wa Gatandatu nibwo ibiro bya Minisitiri w’Intebe byatangaje ingamba nshya zizamara ibyumweru bibiri. Harimo ko ubucuruzi bw’ibikorwa bitari iby’ibanze bwahagaritswe, ingendo zihuza imijyi n’uturere zahagaritswe ndetse n’ingendo zitari ngombwa no kuva mu rugo nta mpamvu zihutirwa birabujijwe.

Abaturarwanda barasabwa gukomeza kubahiriza amabwiriza y’inzego z’ubuzima hitabwaho cyane cyane gukaraba intoki kenshi kandi neza hanubahirizwa intera ya metero imwe (1m) hagati y’umuntu n’undi.  

Itangazo rya Minisiteri y’Ubuzima ya raporo y’umunsi kuri Coronavirus.

 

 

Tanga Igitekerezo ukoresheje Facebook

SHARE