Mu Rwanda bazanye imodoka zikoresha amashanyarazi.

Uruganda rukora imodoka rwa Volkswagen, nirwo rugiye kujya ruzana mu Rwanda, izi modoka zikoresha amashanyarazi zo mu bwoko bwa Golf.

Thomas Schäfer uyobora Volkswagen South Africa mu cyumweru gishize yatangaje ko ku ntangiriro uyu mushinga mu Rwanda uzakora imodoka 50 zikoresha amashanyarazi.

Biteganyijwe ko Volkswagen izajya ikora izi modoka izohereza mu Rwanda naho Siemens ikore ibikorwa byo kuzishyiramo umuriro zikoresha.

Izi modoka zizagenda zongerwa mu Rwanda mu mezi ari imbere nk’uko byavuzwe muri uyu muhango.

Zizajya zishyirwamo umuriro na ‘stations’ 15 za Siemens zizashyirwa ahantu hanyuranye muri Kigali.

Zizabanza gukoreshwa mu gutwara abantu mu buryo bwitwa ‘Mobility Solutions Initiative’ aho abantu bashobora kuzihamagaza nka ‘taxi’ no kuzikodesha bakitwara.

Abashinzwe izi modoka batangaje ko imodoka yuzuye neza umuriro ishobora kugenda 230Km bitewe nanone n’ahantu igenda uko hameze n’imbaraga biyisaba.

Minisitiri w’intebe Édouard Ngirente, mu gutangiza uyu mushinga, avuga ko iyi ari intambwe kuba imodoka za mbere zikoresha amashanyarazi zitangirijwe mu Rwanda.

Yavuze ko u Rwanda rwashyize mu byihutirwa kurengera ibidukikije hagabanywa imyuka ihumanya ikirere. Ko n’Abanyarwanda bose bafite ubushake bwo kurengera ibidukikije.

Ati: “Twizeye neza ko gutangiza ubu buryo bizagabanya ibikorwa byo kwangiza ikirere kandi buzanakwira mu Rwanda no ku mugabane”.

Mu ntangiriro y’uku kwezi, abandi bashoramari batangaje moto zikoresha amashanyarazi nazo zizatangira kwifashishwa mu gutwara abagenzi nka ‘taxi’ mu minsi iri imbere mu Rwanda.

Tanga Igitekerezo ukoresheje Facebook

SHARE