Mu Rwanda habonetse abandi bantu bane barwaye Coronavirus

Kuri iki Cyumweru tariki 15 Werurwe 2020 mu Rwanda hagaragaye abandi bantu bane bamaze kwandura icyorezo cya Coronavirus, umubare w’abayirwaye wahise ugera kuri batanu (5) mu minsi ibiri.

Mu itangazo Minisiteri y’Ubuzima yashyize hanze ivuga ko habonetse abandi barwayi bane bagaragaweho Coronavirus ku butaka bw’u Rwanda.

Aba banduye barimo Umunyarwanda ufite imyaka 34 wageze mu Rwanda ku wa 6 Werurwe 2020 aturutse muri Sudani y’Epfo, umuvandimwe we ufite imyaka 36 wageze mu Rwanda ku wa 8 Werurwe 2020 aturutse mu Birwa bya Fiji anyuze muri Amerika na Qatar.

Barimo kandi umugabo w’Umunyarwanda ufite imyaka 30 udaherutse kugira ingendo mu mahanga n’umusore w’imyaka 22 ufite ubwenegihugu bwa Uganda wageze mu Rwanda ku wa 15 Werurwe 2020 aturutse i Londres mu Bwongereza.

Aba bose bakaba bari kuvurirwa ahabugenewe hanashakishwa abantu bose bahuye na bo kugira ngo basuzumwe ndetse bitabweho n’inzego z’ubuzima.

Abaturarwanda bose barasabwa gukomeza gukurikiza amabwiriza atangwa n’ubuyobozi bw’urwego rw’ubuzima, cyane cyane gukaraba intoki igihe cyose, kutajya ahantu hahurira abantu benshi, no kumenyesha inzego zibishinzwe igihe ibimenyetso by’iyo ndwara byagaragaye, hakoreshejwe umurongo wa telefone utishyurwa ari wo 114 cyangwa bakabimenyesha umujyanama w’ubuzima.

Itangazo rya Minisiteri y’Ubuzima.

 

 

Tanga Igitekerezo ukoresheje Facebook

SHARE