Mu Rwanda kwambara agapfukamunwa byagizwe itegeko ‘nukugakuramo ugiye kurya no kuryama’

Kuri uyu wa Gatandatu nibwo Minisitiri w’Ubuzima Dr Ngamije Daniel yatangaje ko Abanyarwanda bose bagomba gutangira kwambara udupfukamunwa mu gihe bari mu rugo cyangwa bahavuye, nk’uburyo bubafasha kurushaho kwirinda ikwirakwira ry’icyorezo cya Coronavirus.

Minisitiri Dr Ngamije atanagaje ibi nyuma yuko Guverinoma yongereye igihe cyo kuguma mu ngo kugeza ku itariki 30 Mata.

Ubusanzwe amabwiriza yavugaga ko abambara udupfukamunwa n’amazuru ari abantu bafite ibimenyetso bya Coronavirus cyangwa barimo kwita ku muntu wanduye.

Ubu buri wese agomba kukambara kandi aho ari hose, yaba ari mu rugo cyangwa ahavuye biringombwa.

Mu kiganiro na Radio Rwanda, Minisitiri Ngamije yagize ati Abantu bambare udupfukamunwa baba bari mu rugo cyangwa bagiye muri za gahunda zemewe zituma umuntu ava mu rugo kuko bimaze kugaragara ko kukambara ku buryo buhoraho ari uburyo bwizewe bwo kwirinda”.

Yakomeje avuga ko utu dupfukamunwa tuzakorerwa mu Rwanda ndetse n’ibigo bizadukora byamaze guhabwa ibyangombwa byose kuburyo kuwa Mbere tuzatangira gukorwa.

Ati “Mu mpera z’icyumweru hazaba hari udupfukamunwa n’amazuru, tuzaba duhari ku isoko ku buryo uzadushaka wese yakagura akakambara. Ni udupfukamunwa umuntu ashobora kumesa inshuro eshanu ari kazima.”

 “Twese tutwambaye rero ni imwe mu ngamba ikomeye izatuma tugumya gukumira ikwirakwira ry’iki cyorezo ndetse bikazadufasha mu minsi iri imbere, mu zindi ngamba zafatwa ku bijyanye n’uko icyorezo twakirinda muri rusange mu baturage.”

Iki cyemezo kiriyongera ku bisanzwe, ko abantu bakangurirwa gukaraba kenshi amazi meza n’isabune cyangwa umuntu agakoresha imiti isukura intoki.

Imibare ya Minisiteri y’ubuzima yo kugeza kuri uyu wa Gatandatu tariki 18 Mata 2020, hagaragaye undi muntu umwe wanduye Coronavirus mu bipimo 712 byafashwe mu masaha 24, bituma umubare w’abanduye ugera 144. Hanakize abarwayi bashya bane, bituma umubare w’abamaze gukira ugera kuri 69.

Minisitiri w’Ubuzima Dr Ngamije Daniel.

 

 

Tanga Igitekerezo ukoresheje Facebook

SHARE