Mundi Fashion Show igiye kuba ku nshuro ya mbere n’abafite ubumuga bazerekana imideli

Kuri uyu wa Gatanu ku ya 13 Ukuboza 2019 mu mujyi wa Kigali hazabera igitaramo cyo kumurika imideli cyiswe Mundi Fashion Show gifite umwihariko w’uko n’abafite ubumuga butandukanye bazahabwa urubuga bakamurika imideli.

Mundi Fashion Show igiye kuba ku nshuro yambere itegurwa na Mundi Design kubufatanye na UNO Fashion Agency, izitabirwa n’abanyamideli basaga 10 harimo 5 basanzwe bazwi hano mu gihugu barimo na Mundi hakaba n’abandi bazaturuka mu bihugu byo mu karere.

Mugeni Ngendahimana Diane ari nawe washinze Mundi Design, aganira n’abanyamakuru yavuze ko iki gitaramo kizerekana indi ntambwe imaze guterwa mu mwuga wo gukora no kwerekana imideli mu Rwanda.

Ati “Iki gitaramo kizaba ari umwihariko kuko kizitabirwa n’abanyamideli bakomeye kandi babahanga, byumwihariko hari n’itsinda ry’ababana n’ubumuga rizamurika imideli. Twabatumiye mu rwego rwo kugaragaza ko imideli idakorerwa abantu bamwe gusa uko waba uteye kose ushobora kwambara kandi ukaberwa, ikindi ni ukubaha urubuga kugirango nabo bagaragaze impano zabo kuko usanga hari aho bafatwa nkabantu badashoboye”.

Diane yakomeje avuga ko iki gitaramo kizaba ngaruka mwaka ndetse mu nshuro zizakurikira kizajya kizenguruka mu ntara zitandukanye z’igihugu hagamijwe guteza imbere abanyamideli bo mu ntara.

Danny Kwizera uyobora UNO Fashion Agency yavuze ko bahisemo kujya bafatanya na Mundi muri iki gitaramo kuko basanze bahuje intego yo kuzamura no guteza imbere umwuga wo gukora no kwerekana imideli mu Rwanda.

Yizeza abazitabira iki gitaramo ko bazataha banyuzwe, nuzifuza kugura umwenda yashimye bizaba byoroshye.

Mundi Fashion Show izabera kuri HillTop Hotel kuri uyu wa Gatanu guhera saa kumi n’ebyiri z’umugoroba(6:pm). Kwinjira ni 2000Frw kubanyeshuri, 5000Frw abasanzwe na 10.000Frw mu myanya y’icyubahiro (VIP).

Mugeni Ngendahimana Diane washinze Mundi Design.
Danny umuyobozi wa UNO Fashion Agency wambaye ingofero na Mugeni Ngendahimana Diane (Mundi Design) mu kiganiro n’abanyamakuru.

 

 

Tanga Igitekerezo ukoresheje Facebook

SHARE

1 IGITEKEREZO