Myugariro wa Rayon Sports akaba na kapiteni wayo, Eric Rutanga yasezeranye imbere y’amategeko

Myugariro wa Rayon Sports akaba na kapiteni wayo, Eric Rutanga Akram yasezeranye imbere y’amategeko n’umugore we Umunyana Shemsa biyemeza kubana mu buzima bwose, ni mbere gato y’umukino Rayon Sports, izakina na Sunrise FC.

Ku mugoroba wo kuri uyu wa Kane tariki 24 Ukwakira 2019 ku Murenge wa Rwezamenyo mu karere ka Nyarugenge niho inshuti n’abavandimwe b’umuryango wa Rutanga na Shemsa bahuriye kugira ngo babe abahamya b’uko aba bombi babaye umugore n’umugabo mu buryo bwemewe n’amategeko.

Eric Rutanga Akram yasezeranye imbere y’amategeko n’umugore we Umunyana Shemsa

Ibirori byo gusezeranya byatangiye saa 16:00 byitabirwa n’abatandukanye muri Rayon Sports bayobowe na Perezida wawo Munyakazi Sadate, abatoza Kirasa Alain na Javier Martinez Espinosa.

Bagenzi ba Rutanga bitabiriye uyu muhango ni; Amran Nshimiyimana, Herve Rugwiro, Irambona Eric, Mirafa Nizeyimana Hussein Habimana, Maxime Sekamana na Olivier Habineza bakinana na we muri Rayon Sports.

Nyuma yo gusezerana mu mategeko Rutanga yabwiye Urubuga  rwa Rayon Sports ko umugore we Umunyana agiye kumufasha gukomeza gukora akazi ke neza.

Rutanga ati: “Umunyana tumaze imyaka ine dukundana. Ni umugore ukunda Imana kandi ungira inama zubaka iteka. Bijyanye n’uko nyoboye bagenzi bange dukinana mu ikipe ikomeye ngomba no kuba ntuje mu mutwe ntafite byinshi bimvangira. Kugira umufasha ni kimwe mu bifasha umukinnyi gutuza, nizeye ko ahazaza hagiye kuba heza.”

Uyu myugariro w’ibumoso yemeje ko uyu muhango utazamubuza gukina umukino Rayon Sports ifitanye na Sunrise FC kuri uyu wa Gatandatu tariki 26 Ukwakira 2019 mu karere ka Nyagatare kuko nta myitozo azasiba kubera ubukwe.

Tanga Igitekerezo ukoresheje Facebook

SHARE