Natangiye nzunguza fanta mu isoko, amateka ya Paul Ruhamyambuga wubatse inzu ndende ya mbere i Kigali ‘City Plaza’

Paul Ruhamyambuga ni umucuruzi ukomeye mu mujyi wa Kigali akaba na Perezida w’icyubahiro w’ikipe ya Rayon Sports. Uyu mugabo niwe wubatse inzu ya mbere ndende i Kigali izwi nka ‘City Plaza’, yavuze ku rugendo rwe mu bucuruzi n’uburyo Rayon Sports itsindwa ntasinzire.

Mu kiganiro amahumbezi cya Radio Rwanda, Paul Ruhamyambuga wari umutumirwa w’umunsi yasobanuye uko yatangiye ubucuruzi ahereye kubyo yitaga bike, kugeza ubu ari mu mishinga yo kwuba indi nyubako irenze kuri ‘City Plaza’.

Uyu muherwe wavukiye i Nyanza ku itariki ya 25 Mutarama 1961 ari naho yize amashuri abanza, mu mwaka w’1975 ubwo yari ageze mu mwaka wa kabiri wayisumbuye ngo nibwo yaje kwirukanwa ku ishuri kimwe na bagenzi be kubera amateka yivangura yari atangiye gufata indi ntera.

Nyuma yo kwirukanwa ku ishuri yafashe umwanzuro wo kuza gushakira ubuzima i Kigali kuko atari ashoboye guhinga,  ngo ntibyari byoroshye ko mama we amwemerera kugenda ariko arahatiriza kugeza yemeye. Umubyeyi yaramusengeye amuhesha umugisha abona gufata urugendo yerekeza i Kigali.

Paul yakomeje avuga ko ageze i Kigali yakiriwe n’abandi banye-Nyanza nyuma nyirarume aza kumugira inama yo kujya azunguza fanta mu isoko ryahoze mu mujyi, abitangira afite igishoro cy’amafaranga ibihumbi 28 (28.000Frw) yavanye iwabo. Byaje kumuhira kuburyo yacuruzaga amakaziye 10 ku munsi, nyuma ashaka n’abandi bana aha akazi bakajya bamucururiza akabahemba.

Mu gihe kitageze no ku mwaka Paul yari ahagaritse gucuruza fanta maze yinjira mu bucuruzi bw’imyenda ya caguwa ayijyana mu masoko yandi yo mu byaro.

Mu 1979 ubuzima bwari butangiye guhinduka maze agura moto bwa mbere, ntibyatinda mu 1981 yahise agura imodoko imufasha mu bucuruzi bwe. Bigeze mu 1990 yaje guhungira mu Burundi akomereza muri Kenya kuko yari yarashyizwe ku rutonde rw’abahigwaga na leta yariho icyo giha, ajya gukomerezayo ubucuruzi bwe.

Nyuma yuko igihugu kibohowe na Jenoside igahagarikwa, Paul yagarutse mu rwamubyaye ndetse anakomeza ibikorwe bye by’ubucuruzi mu buryo bwaguye ari nabwo yatangiraga umushinga wo kwubaka ‘City Plaza’ maze mu 2000 itahwa ku mugaragaro na Perezida Paul Kagame.

Ruhamyambuga avuga ko mu byamfushajie kugera kure mu bucuruzi bwe harimo kuba umunyakuri no kwihangana. Yishimira ko u Rwanda rweteye imbere kuburyo nyuma ya ‘City Plaza’ haje nandi mazu menshi y’ibirahure kandi yifuza ko yakomeza kwiyongera.

Nyuma y’iyi nyubako yaciye ibintu ngo ari mu mushinga wo kwubaka indi nyubako ikomeye, agira urubyiruko inama yo kwiga imyuga, kudasuzugura akazi kuko nta kazi gato kabaho ndetse bakirinda ibiyobyabwenge.

Yatangiye gukunda Rayon Sports afite imyaka umunani gusa

Paul Ruhamyambuga akibazwa n’umunyamakuru kuri Rayon Sports, ahita asubiza ati “Rayon Sports n’ubuzima bwanje”.

Avuga ko yatangiye kumenya iyi kipe afite imyaka umunani y’amavuko iwabo i Nyanza, nyuma ya 1994 amaze gutahuka nibwo yinjiye mu buyobozi bwayo. Yemeza ko ibibazo bihora biyivugwamo biterwa nuko ari ikipe ikundwa na benshi kandi ikintu cy’abantu benshi kiragora kukijera.

Ati “Nyiyoboye igihe kinini cyane, hari igihe manda yanjye yabaga irangiye hakajyaho abandi bikabananira, nkongera nkagaruka gutyo gutyo… kugeza n’ubu n’inshingano dufite ntabwo tuzatuma Rayon Sports ijya mu muhanda. Urebye turi kubishyira ku murongo kuko hari n’abantu baba bishakira inyungu zabo ariko turi mu nzira nziza zo kubikora.”

Uyu muyobozi akomeza avuga ko hari ubwo Rayon Sports itsindwa akarara atariye kubera agahinda, ashimangira ko iyi kipe itagurishwa kuko ntanyirayo igira ari iyabantu bose.

Asoza asaba FERWAFA ko yajya yumva ubusabe bw’amakipe nka Rayon Sports atunzwe n’abakunzi bayo gusa, imikino yayo ikajya ishyirwa mu mpera z’icyumweru aho gushyirwa mu mibyizi kugira ngo abakunzi bayo baze ku bibuga amafaranga aboneke.

Paul Ruhamyambuga amaze imyaka irenga 20 ari mu buyobozi bwa Rayon Sports.

 

 

Tanga Igitekerezo ukoresheje Facebook

SHARE