Ne-Yo na Meddy bategerejwe i Kigali mu gitaramo cyo kwita izina

Umunyamerika w’icyamamare muri muzika ku Isi, Shaffer Chimere Smith uzwi nka Ne-Yo yatumiwe mu Rwanda mu gitaramo cyo kwita amazina abana bashya b’ingagi. Akazafatanya n’umunyarwanda Meddy.

Kuri uyu wa Kabiri tariki 20 Kanama 2019 nibwo ikigo cy’igihugu gishinzwe iterambere RDB cyagiranye ikiganiro n’itangazamakuru maze gitangazako aba bahanzi bazataramira Abanyarwanda mu ntangiriro za Nzeri 2019.

Belise Kaliza, Umuyobozi ushinzwe ubukerarugendo muri RDB yavuze ko  igitaramo cyo kwita izina cy’uyu mwaka cyatumiwemo abahanzi barimo Meddy na Ne-Yo wo muri Leta Zunze Ubumwe za Amerika ndetse ngo nabo bazita amazina abana b’ingagi.

Iki gitaramo kizaba ku itariki ya 7 Nzeri, ni nyuma y’umuhango wo Kwita Izina uzaba tariki ya 6 Nzeri 2019. Muri uyu mwaka hazitwa abana 25 b’ingagi bavutse.

Ne Yo w’imyaka 39, ni umubyinnyi, umuririmbyi n’umwanditsi w’indirimbo, afite umugore n’abana 4, yamenyekanye mu ndirimbo zitandukanye nka Miss Independent, One In A Million n’izindi.

Abandi bashyitsi b’ibyamamare ku isi batumiwe mu Kwita Izina uyu mwaka harimo Tonny Alexander Adams wakiniye Arsenal Fc mu gihe cy’imyaka 22 akaba na kapiteni wayo mu gihe cy’imyaka 14 ndetse yanabaye na kapiteni w’ikipe y’u Bwongereza, na Louis Van Gaal watoje amakipe akomeye ku isi nka FC Barcelona, Manchester United, Bayern Munich, Ajax Amsterdam n’ikipe y’igihugu y’u Buholandi.

Ne-Yo azataramira Abanyarwanda ku nshuro ya mbere.
Meddy azahurira ku rubyiniro n’icyamamare Ne-Yo.

Tanga Igitekerezo ukoresheje Facebook

SHARE