N’iki Gituma Muzika y’abahanzi bo mu ntara idafatisha mu Gihugu hose cyane mu mujyi wa Kigali ?

U Rwanda ni igihugu kigizwe n’imisozi, kidakora ku nyanja kandi gituwe cyane kikaba gifite ibibazo by’ubutaka budahagije. U Rwanda rufite ubuso bwa Km2 26,338. Rugabanyijwemo intara enye ndetse n’umujyi wa Kigali ari nawo murwa mukuru w’Urwanda.

Jenoside yakorewe Abatutsi muri 1994 yashegeshe ubukungu bw’igihugu, isiga abaturage mu bukene bukabije, cyane cyane abari n’abategarugori n’urubyiruko ,maze ituma igihugu gitakaza ubushobozi bwo gukurura abashoramari. Nyamara u Rwanda rwateye intambwe igaragara mu gusana no gusubiza ubukungu kurusha n’uko bwari bwifashe mbere ya 1994.

Ubu Urwanda n’Igihugu gitekanye,gisurwa n’amahanga kandi cyigirwaho byinshi,Urwanda rumaze gutera imbere ku buryo bugaragara mu buzima bwa buri munsi,abaturage bakora imilimo itandukanye ibateza imbere by’umwihariko urubyiruko rugize igice cyinini cy’abarutuye ruri kurushaho gushishikarizwa kw’iteza imbere binyuze mu kwihangira imilimo ndetse no kubyaza umusaruro impano rwifitemo.

Mu bihugu biteye imbere nka Leta zunze Ubumwe za Amerika  10% by’ umusaruro mbumbe w’ubukungu (GDP) buri mwaka biva mu buhanzi, no muri Afurika y’Epfo ubuhanzi bwinjiza 5,4% ku bukungu bw’igihugu buri mwaka. No mu Rwanda ubuhanzi bwagira uruhare mu kuzamura ubukungu bwacu kuko bimaze kugaragara nk’aho benshi batunzwe nabwo ndetse n’ibikorwa remezo bishyigikira ubuhanzi bikaba bigenda byaguka ku buryo bugaragara haba mu mujyi wa Kigali no mu ntara z’igize Urwanda.

Usibye gutanga ibyishimo no kuruhuka neza,Ubuhanzi n’Umwuga utunga uwukoze neza kuko umuha umusaruro ugaragara mu buzima bwa buri munsi akiteza imbere ndetse agatanga umusoro ufasha kubaka Igihugu.

Muri iyi nkuru Umunyamakuru wa IBYAMAMARE.COM yegereye Urubyiruko rutuye mu ntara z’Urwanda ndetse n’urukurikirana ibikorwa by’imyidagaduro maze rutubwira kw’idindira ry’ibikorwa by’ubuhanzi bwa muzika mu ntara batuyemo kuko bikigaragara ko bitorohera umuhanzi ukorera muzika mu ntara kwamamara ku rwego rw’igihugu no kumenyekana mu mujyi wa Kigali hafatwa nk’igicumbi cya Muzika Nyarwanda.

N’iki Gituma Muzika y’abahanzi bo mu ntara idafatisha mu Gihugu hose cyane cyane mu mujyi wa Kigali ??

Ibi ni bimwe mu bitecyerezo byabaganiriye na IBYAMAMARE.COM kuri iyi ngingo

Itsinda rya THE SAME si irya vuba mu matwi y’abakurikira muzika Nyarwanda,ni bamwe mu bahanzi bamaze igihe muri uyu muziki banakoranye indirimbo n’Abahanzi bazwi mu Rwanda nka Oda Pacy,Ama G The Black, Bull Dogg banakorerwa indirimbo n’aba Producers bakomeye nka Bob Pro,Junior Multisysteme,Piano n’abandi batandukaye.

The Same iti : “Biragoye cyane kuba umuhanzi wo mu ntara yafatisha mu mujyi wa Kigali kuko bisaba imvune nyinshi cyane cyane mw’Itangazamakuru kuko iyo usohoye igihangano ukakijyana i Kigali bagufata nk’umuhanzi ucyishakisha ntago baguha umwanya,tutibagiwe no kumva wabagira neza, hari abavuga ngo qualite y’ibihangano iba iri hasi  ibyo si byo  kuko niyo ukoreye aho i Kigali bumva ko ufite amafaranga y’umurengera hari na Studio ujyamo bakorera 30.000Frw wowe bakaguca nka 80.000Frw. n’ibintu bisaba imbaraga nyinshi cyane tuzaguma kurwana nabyo ariko imyaka tugezemo bagakwiriye gufata abahanzi kimwe”

Inama za THE SAME ku bahanzi bakorera muzika mu ntara muri rusange

“N’ibintu bisaba ko abahanzi nabo ubwabo bumva ko uyu muziki atari ibintu byo gupfa kwinjiramo,usaba imbaraga zirimo amafaranga,abajyanama no kuba inshuti n’Itangazamakuru cyane ndetse no kwegera abafana cyane,tugerageze dushyiremo imbaraga,dukore indirimbo nziza bizaza “

Itsinda rya THE SAME bi Rubavu bamwe mu bahanzi bamaze igihe muri muzika

Igitecyerezo cya Julesce Pro umunyeshuli wa Muzika mw’ishuli ryahoze ku Nyundo ryimuriwe i Muhanga

“Amafaranga,itangazamakuru rikiri hasi mu ntara ritagera kure, production,ubunyamwuga buke,kunyurwa no kumenyekana  muntara gusa,kutiyizera kumvako Kigali ariyabantu barenze gusa,gucibwa intege, gukorera mukavuyo,kutagira plan ,Kigali ntiwayibamo umustar utayituyemo”

Tuyishime Sebat umunyamakuru wa Radiyo Isangano ikorera mu karere ka Karongi mu ntara y’uburengerazuba ntajya kure ya Julesce Pro aho agira ati :

“Byose n’ubushobozi,umuziki usaba amafaranga,usibye ko tutakwirengagiza n’abahanzi baba badafite impano abona aririmbye akumva yabaye umuhanzi”

Uwitwa Yvan Joshua umuhanzi mu ndirimbo zo kuramya no guhimbaza Imana akaba n’umwe mu bakurikirana imyidagaduro wo mu karere ka Bugesera agira ati :

“Biratandukanye cyane kandi biranagoye gufatisha Kigali nta kantu(amafaranga) cyangwa  nta network uhafite!, Kigali  n’akazu abo mwumva kumaradiyo ntago aribo babizi bonyine ahubwo bamwe n’abanyamuryango,incuti mu buryo ubu naburiya nabanyamakuru,aba Dj’s bakomeye cyangwa Show busy dealers”

Gaby Gael umunyamakuru w’imyidagaduro wa Radiyo Ishingiro mu karere ka Gicumbi mu ntara y’amajyaruguru hari uko abibona

” Hari ukutegera itangazamakuru,aho bamwe bumva bakinwa ku maradiyo y’iwabo bakumva birabaye,kudakora cyane ngo biyungure ubumenyi no kutegera abahanzi bakuru ngo babasabe inama ku rundi rwego aba stars bakunda kunaniza abahanzi bakizamuka niyo banakoranye indirimbo ntibafata umwanya wo gufasha uwo muhanzi kuyamamaza ikindi kinakomeye n’ubushobozi hakenewe abashora imali mu banyamuziki bo mu ntara “

Umuhanzi ukora injyana ya Hip Hop mu karere ka Musanze mu ntara y’amajyaruguru har’uko abibona

“ubundi impamvu muzika yo mu ntara idatera imbere akenshi
usanga ibinyamakuru byose aho biva bikagera biherereye kigali Radiyo,Televiziyo, Online Tv , Ibinyamakuru byandika muntara ni bicye  hazamo nikibazo cyinzara nyinshi kuri buri ruhande byose bigapfa”

Umuraperi Apple Gold ukorera muzika mu karere ka Rubavu asanga n’Itangazamakuru ryo mu ntara abarikoramo nabo ubwabo bakwiriye kwikosora

“Ubundi bwo mbere yo gutunga intoki itangazamakuru ry’i Kigali tubanze turebe iry’iwacu. ese rigera he ? abarikoramo bo ni bantu ki ? abakatujyanye aho i Kigali nabo ubwabo ntibagerayo,sinatinya kuvuga ko dufite abanyamakuru badakora kinyamwuga yumva wamuha amafaranga ntakurenze n’uturere tubiri. inama natanga umuhanzi ashake amafaranga kuko umuziki usaba ubushobozi niyo wabona Tour kuri radiyo zose zi Kigali udafite Transports ikujyanayo,ibyo uzarirayo naho uzarara ntiwayijyamo. iyo tuvuze amafaranga si aya Giti nayo kugufasha muri business yawe “

Apple Gold umuraperi wi Rubavu

Crezzo G Samuelo N’umuhanzi umaze imyaka itari micye mu muziki Nyarwanda Ibyamamare.com twamubajije impamvu izina rye ridashashagirana mu ruhando rwa Muzika Nyarwanda.

Muri rusange ikibazo n’amikoro macye,muri iki gihe usabwa gukora umuziki ufite quality nziza, ukayikorera amashusho meza ndetse na promotion, iyo nta mikoro ahagije rero, ukaba nta n’abantu ufite bagufasha mu bikorwa byawe ngo bashoremo ubushobozi bw’amafaranga, bituma umuntu adatera imbere cyane ngo yamamare ku rwego rushimishije.” 

Crezzo G umuhanzi umaze imyaka itari micye muri muzika,arazwi cyane muri Rusizi na Nyamasheke

Umunyamakuru uzwi mu guhirimbanira injyana ya Hip Hop uzwi kw’izina rya  Believer Ishimwe nyiri igitangazamakuru HIP HOP YACU yagize ati :

“gushyiramo imbaraga ntago ari ugukora indirimbo gusa, ahubwo harimo n’ukumenya uko izo ndirimbo wakoze zagera ku bantu akenshi ngira inama abahanzi gutangira bagasahaka ababafasha mu buryo bwo kumenyekanisha ndetse no kugenzura ibikorwa byabo (Team management ) ikindi no gukora ibikorwa bijyanye n’igihe ndetse no gushyira ikinyabupfura no kubaha mubyo bakora byose. Ntibagiwe nabo ubwabo gufashanya mu bikorwa bakora birinda kuryana no kutumvikana ahubwo batahiriza umugozi umwe”

N’ubwo bamwe barira kuba batarenga intara batuyemo abo mu karere ka Ngororero bo barabogoza. uyu n’uwitwa Masengesho Theo umuhanzi uhakomoka.

“Naba naza Rubavu,Musanze,Huye na Rusizi bo bapfa no kwidagadura bya nyabyo ,twe hano i Ngororero twarumiwe,nta bikorwa by’imyidagaduro bihaba twibaza icyo ubuyobozi bw’urubyiruko bumaze niba bunahari, idindira ryacu iry’ibanze ni ku bikorwa remezo n’ubuvugizi ku buryo twakwiteza imbere dukoresheje impano zacu. Twe ni mw’icuraburindi banza tuzajya twiyumvira ibyo byamamare gusa ! “

Masengesho Theo ngo i Ngororero bo bararize barahora !

N’ubwo biri uku ariko bamwe ntibatinya kwerura ko Abahanzi bakorera muzika mu ntara bamwe muri bo bataraha agaciro umwuga bakora nk’aho usanga ibihangano byabo nta mwimerere bagashinja zimwe mu nzu zitunganya umuziki kuba zikiri hasi

“Tutabeshyanye zimwe muri Studios zo mu ntara  ziracyari hasi,abazikoramo ntibashaka kwiga no kwihugura kubabarusha ubumenyi,hari indirimbo wumva ukumva rwose utayumvisha abantu,si mvuze ko aba Producers bose bahari badashoboye ariko bamwe muri bo barabivanga cyane” 

Umunyamakuru,umuhanzi akaba n’utunganya muzika uzwi kw’izina rya Jimmy Claude wo mu karere ka Karongi agira ati :

“Abahanzi mu ntara barahari,Studios ndetse n’ibitangazamakuru birahari kandi birakora mu rwego rwo gufasha abanyempano. Mbona igituma abahanzi mu ntara badafatisha iyo za kigali hari uruhare rwa benshi mpereye ku bahanzi ubwabo,abashoramali,ubuyobozi,itangazamakuru ntibagiwe n’abafana”

“Abahanzi nibasobanukirwe icyo bakeneye ndetse banaharanire kumenya inzira zose zabafasha kugera aho bifuza,abashoramali ntabwo baraha imbaraga mu gufasha abanyempano bita kubahanzi bamaze kubaka amazina gusa n’ubuyobozi ntibwegera abanyempano”

Jimmy Claude umunyamakuru,umuhanzi akaba na Producer mu karere ka Karongi

Hari kandi abashinja Itangazamakuru ryo mu mujyi wa Kigali kubaka ruswa izwi kw’izina rya Giti

“Sinshaka ko utangaza izina ryanjye,s’uguharabika mfite sms z’abanyamakuru bo muri Kigali nashyiriye ibihangano byanjye banyaka Giti(ruswa) kugira ngo bankine,nasanze ntajya mbona amafaranga yo kubaha buri gihe mpitamo guturiza aha iwacu ,Mu ntara dufite umuziki mwiza nizo studios zi kigali rimwe narimwe tuzikoreramo ariko gukinwa harimo ruswa nyinshi.ku bwanjye naho bipfira nta handi niyo wabaha ayo mafaranga har’ubwo bagukina uwo munsi bigahita birangira, ntidukora indirimbo mbi ba First Boy bakorera Riderman bari mu ntara,Fazzo na Devydenko baradukoreye niyo wajya kwa Made Beat nta giti utanze ntiwagafata” 

Bamwe mu bategura ibitaramo n’abafasha abahanzi bavuga ko Abakunzi ba muzika Nyarwanda mu ntara nabo ubwabo badashyigikira abahanzi babo kandi baba babacyeneyeho ubufasha bukomeye

“Birababaje kuba ushobora gutegura igitaramo haba hatarimo umuhanzi uvuye i Kigali nticyitabirwe,abakunzi ba Muzika bagomba kumva ko bagomba gufasha aba bahanzi kuko nibitabira ibitaramo byabo bazabona amafaranga azatuma bagera naho i Kigali kandi byakunda cyane,icyambere n’urukundo “

Nk’abahanzi bafite icyerekezo kandi bashaka kumenyekana no gutungwa n’impano zabo hari ubutumwa bahuriraho

UBUFATANYE

Ubufatanye no gushyira hamwe biza kw’isonga mu byatuma abahanzi bo mu ntara babasha kugira urwego rufatika bageraho haba hagati yabo ndetse n’abahanzi bakuru bamaze gutera imbere muri muzika Nyarwanda.

KWITINYUKA

Abahanzi bo mu ntara bagomba kwikuramo imyumvire yo kumva ko bitakunda kumenyekana mu mujyi wa Kigali no hanze y’intara batuyemo bakamenya ko muzika nta mupaka igira kandi nta n’ururimi igira aho basabwa gutinyuka bakagana n’amazu atunganya muzika akomeye bagakorana.

KWEGERA ITANGAZAMAKURU

Harageze ko imyumvire ishaje yo kumva ko igihe umunyamakuru umwe akwatse iyo Giti(Ruswa) uhita ubigereka kw’itangazamakuru ryose bigomba gucika (dore ko abenshi nta n’ibimenyetso bifatika batanga),abahanzi bagomba kwegera itangazamakuru nta gutinya bakumva ko bashoboye.

GUKORA KINYAMWUGA

Abahanzi bakorera muzika mu ntara bakwiriye kumenya byimbitse ko muzika atari ikibuga cyo gutagaguzamo amafaranga ko bagomba gukora muzika ifite intego kandi ihamye bagakora ibintu bifite umwimerere bakiga n’uko batezwa imbere n’umwuga bakora.

MAYLO umuraperi wo mu karere ka Musanze umwe mu bahanzi ntashidikanyaho w’umuhanga

 

Tanga Igitekerezo ukoresheje Facebook

SHARE