Nimungire Inama mbigenze nte?, Umugore wanjye tumaranye imyaka 14, none yambwiye ko abana 3 dufite atarinjye wababyaye

Mfite agahinda gakomeye maranye amezi abiri, ndabinginze ndashaka ko abakunzi b’uru rubuga mungira inama kuko ndaremerewe cyane.

Nitwa Peter mfite imyaka 49(amazina yahindunduwe k’ubwumutekano we ) ntuye mu ntara y’amajyepfo kugeza ubu narinziko ndi Se w’abana Batatu ariko uku kubaye ukwezi kwa 2 menyeko abana mbana nabo atarinjye wababyaye.

Uko Ikibazo Giteye, Imyaka 14 irashize, nkoze ubukwe n’umugore wanjye nkunda kugeza n’uyu munsi, ndi umugabo wifashije, twakoze ubukwe bwiza cyane muri 2007 umgore wanjye yari asoje Kaminuza i Butare nanjye icyo gihe narimvuye mubutumwa bw’akazi i Burayi.

Tukimara gukora ubukwe nahise nsezera akazi nakoreraga hanze y’igihugu kuko nifuzaga kwegera umuryango wanjye, mpita ntangira business y’ubucuruzi bw’iduka ry’inzoga z’amarikeri, nkanjya ndangura ibicuruzwa nkazanira umugore nawe akaranguza.

Tumaze kubyara abana 2, naje kongera kubona akazi ku mugabane w’iburayi kuko nabonaga umushara uruta amafaranga ndikwinjiza, nagishije umugore inama, twumvikana ko ngiye gukora ako kazi, kagombaga kumara imyaka 2, ndagenda nawe akomeza gucuruza no kurinda urugo.

Umwaka ushize kubera icyorezo cya Koronavirusi, akazi kanjye karahagaze ndetse n’akumugore karahagarara kuko twaranguzaga amarikeri ntabwo twari tukibona abaguzi nkuko byari bisanzwe, inzu twakodesha twayishyuraga arenga Miliyoni na 500 kuko nabonaga bigoranye ntakora ndetse n’akazi karapfuye nasabye umugore ko ubwo bucuruzi twabuhagarika, umugore ambera ibamba ambwirako ariwe wavunikiye iryo duka, ntagomba kurigurisha ahubwo tugomba gutegereza imirimo ikongera ikagenda neza mugihugu.

Nararebye mbona njye ndi guhomba kuko twishyuraga inzu buri kwezi kandi tudakora ndetse ntamafaranga umugore yari afite kuko yambwiraga ko hari abantu benshi bamurimo amadeni batamwishyuye ariko yizeye ko bazamwishyura imirimo niyongera gutangira, nakomeje kwikora kumufuka nkishyura ya nzu dukoreramo ariko bigeze aho ndarambirwa kuko nabonaga ntacyizere mfite ko akazi kacu kazongera kugenda nkuko byari bisanzwe.

Nk’umugabo nahise mfata umwanzuro iduka ryacu ry’inzoga ndarigurisha ariko mbikora umugore atabishaka ndetse turanarakaranya cyane.

Mu mpera z’umwaka wa 2020, umugore wanjye yatangiye kwinjira mubanyamasengesho, ngo yaje kwihana aratura asaba Imana imbabazi avugako yanshiye inyuma inshuro nyisnhi ndetse ngo nabana 3 turikumwe ngo sinjye wababyaye.

Aya makuru yangezeho, ariko ntabwo nayahaye agaciro, umugore naje kumwegera, maze ahita ampa ukuri kose, ambwira ko umwa wambere dufite w’imyaka 13 yaje amutwite, ari inda yatewe n’umusore biganaga muri kaminuza.

Ambwirako, umwana wa kabiri  w’imyaka 8 nawe atari uwanjye, yamubyaranye n’umusore w’umusirikari bigeze gukundanaho ubwo yari muri Secondaire, uwa gatatu ambwirako nawe inda yayisamye mugihe nari mubutumwa bw’akazi, ni ukuri ntababeshye nahise nikubita hasi mara iminsi ibiri numva ubwonko bwaratakaye ntazi iyo ndi.

Naje guhamagara umuryango wanjye n’uw’umugore mbazana murugo, mbabwira uko ikibazo kimeze baranyumva nuko umugore nawe baramubaza, umugore nkuko yabimbwiye ni nako yabisubiyemo imbere y’imiryango yacu.

Umuryango twatandukanye umbwiye ko twajya gupimisha ibizamini by’isano y’amaraso ADN kugirango barebe koko niba ibyo umugore avuga aribyo.

Nabuze icyonkora, Ese nemere tujye kwamuganga turebe niba koko iby’umugore yambwiye  ari ukuri? Ese musige mu nzu nigendere? NI UKURI NDAREMEREWE NABUZE UKO NABIGENZA NI MUNGIRE INAMA?

Ukuntu nakundaga aba bana nabo bakankunda nabyo birikunshengura umutima, MBIGENZE NTE?

Tanga Igitekerezo ukoresheje Facebook

SHARE