Nsanzamahoro wamamaye nka Rwasa yashyinguwe, abagombaga gukina muri filime nshya yateguraga basabye ubufasha kugirango izakorwe (Amafoto)

0
1831

Ku gicamunsi cyo kuri iki Cyumweru tariki 8 Nzeri 2019 nibwo Nsanzamahoro Denis wamamaye muri cinema nyarwanda nka ‘Rwasa’ yashyinguwe mu cyubahiro i Rusororo mu muhango waranzwe n’agahinda kavanze n’amarira.

Rwasa yitabye Imana kuwa Kane tariki ya 5 Nzeri 2019 azize indwara ya diabete, mu gitondo cyo kuri iki cyumweru nibwo habahayeho umuhango wo kumusezeraho burundu mbere yuko ashyingurwa i Rusororo.

Uyu muhango wo kumusezeraho ukaba wabanjirijwe n’isengesho rya pasiteri Museveni. Nyuma yo kumuragiza Imana abantu batandukanye bagiye bafata ijambo bagira icyo bavuga kuri Nyakwigendera.

Uncle Austin wavuze mu izina ry’abandi bahanzi, yavuze ko Rwasa atari umukinnyi wa filime gusa kuko yafashaga n’abahanzi. Yitanzeho urugero ko hari indirimbo 2 yamufashije kwandika.

Abiganye na Rwasa mu mwaka wa 1980-1987 barimo Umunyamabanga wa Leta muri Minisiteri y’Ububanyi n’Amahanga, Olivier Nduhungirehe bahishuriye abari aho ko yari yarababwiye ko yitegura ubukwe ndetse yari yaranamaze kubereka umukunzi we bendaga kurushinga.

Bamwe mu bakinnyi bakinanye na Rwasa muri filime yitwa Sakabaka, bahishuye ko uyu mugabo hari indi yari yaramaze kwandika ndetse yaranamaze guha abakinnyi ibyo bazakina, basabye ko umuntu wese ukunda Rwasa yazababa hafi bagakora iyi filime yari yaranditse yitwa ‘Pilato’.

Nyuma yo kumusezeraho bwa nyuma mu rugo aho yari atuye Kicukiro, abari baje kwifatanya n’umuryango we bamuherekeje ku irimbi rya Rusororo aho bagiye kumushyingura.

Uncle Austin kwihangana byanze asuka amarira.

Abakinanye na we muri Sakabaka biyemeje gukora filimi yasize yanditse.

Umuhungu wa Nsanzamahoro aherekeza se.

 

SHARE