Nyampinga w’u Rwanda 2014, Akiwacu Colombe yatashye inzu ya miliyoni 18 yubakiye abatishoboye(Amafoto)

Nyampinga w’u Rwanda 2014, Akiwacu Colombe ku munsi w’ejo hashize ku Cyumweru yatashye inzu Intwaza yubatse mu karere ka Rwamagana aho izatuzwamo ababyeyi bane barokotse Jenoside yakorewe Abatutsi mu 1994 bibumbiye mu muryango Intwaza, yuzuye itwaye miliyoni 18

Uyu muhango wabaye tariki ya 15 Nzeri 2019, ukaba wari witabiriwe n’umuboyozi w’Intara w’Ibirasirazuba, Mufulukye Fred ndetse n’abayobozi batandukanye b’akarere ka Rwamagana.

Iyi nzu izatuzwamo ababyeyi bane b’Intwaza, yubatswe mu karere ka Rwamagana, mu Kagari ka Bwiza umurenge wa Kigabiro.

Akiwacu Colombe yavuze ko atari igikorwa cyari cyoroshye ariko akaba yaragize amahirwe agakorana bya hafi n’ubuyobozi bw’Intara ndetse n’ubwa Karere.

Yagize ati“Nkimara kugira iki gitekerezo, natangiye gushakisha abafatanyabikorwa ariko nagize amahirwe, nkorana n’Intara, n’Akarere, bambera abayobozi beza bumva abaturage. Bambaye hafi maze kubabwira umushinga, bawumva vuba, bampa ikibanza cyo kubakamo, nkomerezaho.”

Yakomeje avuga ko ari intangiriro nziza yo gufatanya n’Intara y’Iburasirazuba kuko ari intara yumva abaturage bayo.

Yagize ati “Iyi ni intangiriro yo kugira ngo tuzakorane byinshi nk’Intara y’Iburasirazuba kuko ni Intara yumva abaturage, bizanshimisha cyane gukomeza gukorana namwe”

Guverineri w’Intara y’Iburasirazuba, Mufulukye Fred yavuze ko ibyo Miss Akiwacu Colombe yakoze bakwiye kubera buri wese isomo maze mu bushobozi bwe akagira icyo akora cyafasha abandi.

Yagize ati“Twese ibi dukwiriye kubikuramo amasomo, bivuze ko buri wese aba akwiriye gukora icyo ashoboye, akitanga mubyo afite no mu bitekerezo kugira ngo ashobore gutanga umusanzu wo kubaka igihugu cye”.

Yakomeje avuga ko uyu mwana w’umukobwa akwiye gushimwa cyane, kuko ngo hari abashobora kumva ko yabaye nyampinga wa 2014 bakumva afite amafaranga menshi kandi atari byo kuko na we akiri umunyeshuri, ahubwo duke afite azi kudufashishamo abandi ngo ari nabyo Perezida Kagame yavuze ko u Rwanda ari u rw’abanyarwanda.

Mujawayezu Xaverine, visi perezida w’unuryango Avega Agahozo yashimiye cyane Miss Akiwacu Colombe ku bw’igikorwa cy’ubutwari yakoze kuko atari buri wese wagishobora.

Twagiramariya Collette, umwe mu batujwe muri iyi nzu, yashimiye cyane Intara y’Iburasirazuba, Akerere ka Rwamagana ndetse na Miss Akiwacu Colombe ku nzu babahaye kuko izo barimo zari zishaje.

Tanga Igitekerezo ukoresheje Facebook

SHARE