Search

P-Fla arasaba leta ko ‘mugo’ yarwanywa byumwihariko kurusha ibindi biyobyabwenge

NAWE WATUNGA IMODOKA Y'INZOZI ZAWE, KANDA HANO WIGURIRE IMODOKA ZIHENDUTSE GUHERA KU MAFARANGA IBIHUMBI 100 GUSA

KANDA HANO UREBE VIDEO

Umuhanzi w’umuraperi Murerwa Amani wamenyekanye nka P-Fla nyuma yuko afunzwe umwaka azira gukoresha ibiyobyabwenge, arasaba leta ko muri gahunda nshya irigukorwa yo kubirwanya icyitwa ‘mugo’ cyafatirwa ingamba zihariye kuko aricyo kiyobyabwenge gihagarariye ibindi kandi cyangiza nabi cyane.

P-Fla arasaba ko ikiyobyabwenge cya Mugo cyarwanya by’umwihariko.

Mu mpera z’umwaka wa 2016 nibwo P-Fla yakatiwe gufungwa umwaka muri gereza nkuru ya Nyarugenge i Mageragere azira gukoresha ibiyobyabwenge.

Mu Ukuboza 2017 nibwo uyu musore yarekuwe, kuva yafungurwa yatangaje ko yazinutswe atazongera gukoresha ibiyobyabwenge ukundi, ibintu byashimishije benshi mu bakunzi ba muzika ye maze nabo batangira kumugaragariza urukundo rudasanzwe mu bitaramo bitandukanye yagiye yitabira byasozaga umwaka wa 2017 dore ko ubwo yari akibikoresha atabashaga no kwitabira ibitaramo yabaga yatumiwemo.

Mu kiganiro P-Fla aherutse gutumirwamo kuri televiziyo y’igihugu aho yari kumwe n’umuvugizi wa Polisi y’igihugu, ACP Theos Badege n’abandi bayobozi batandukanye baganira ku miterere y’ikibazo cy’ibiyobyabwenge. Uyu muhanzi yasabye ko muri gahunda ihari yo kurwanya ibiyobyabwenge icyitwa ‘heroine’ kizwi cyane nka ‘mugo’, cyafatirwa ingamba zihariye kandi zikakaye kuko cyo gitandukanye n’ibindi byose.

Yagize ati “Nanjye nafunzwe mfatanywe Mugo murabizi, rero numvaga yatandukanywa n’ibi biyobyabwenge bindi byose, Mugo ikaba umwihariko mu Rwanda hose igafatirwa ingamba zikomeye cyane kuko yo iteye ubwoba, yangiza vuba kandi buriya niyo ikuriye ibindi biyobyabwenge byose”.

P-Fla avuga ko yatangiye kuyinywa ayimenyeye i Burayi aho yari yaragiye kwiga, bikaza no gutuma atarangiza amashuri yari yaramujyanye, ngo ubwo yagarukaga mu Rwanda yibwiraga ko atandukanye no kunywa mugo burundu atazongera kuyibona ariko atungurwa no gusanga naho yarahageze.

Anavuga kandi ko mugo ariyo yabaye intandari yo kudakoresha impano ye ya muzika nk’uko bikwiye, gusa ubu yaciye ukubiri nayo ngo umwaka yamaze muri gereza wamufashije kwongera kuba umuntu uzira ibiyobyabwenge.

P-Fla muri iki kiganiro cyacaga kuri televiziyo Rwanda yari kumwe na ACP Theos Badege umuvugizi wa Polisi y’igihugu, Bosenibamwe umuyobozi w’ibigo ngororamuco na Muvunyi uhagarariye Choral Ambassadors of Christ.

Uyu muraperi uri mu bakunzwe cyane mu Rwanda, avuga ko umwana unywa mugo bimukururira n’ingeso y’ubujura, aho bimusaba kwiba kugirango abone amafaranga yo kujya kuyigura dore ko inahenda. Mu bimenyetso yavuze byakugaragariza umwana watangiye kunywa mugo, harimo kunanuka bikabije, kutabasha kurya kandi ubona ko ashonje, kubira ibyunzwe ariko wamukoraho ukumva akoje bikabije n’ibindi.

Mu gusoza iki kiganiro P-Fla ukunze kwiya The Great yasabye abahanzi bagenzi be n’abandi bumvwa n’urubyiruko cyane guhaguruka bagatanga ubutumwa bubakangurira kwirinda ibiyobyabwenge kuko ntakeza kabyo usibye kwangiza ubuzima gusa.

REBE IKIGANIRO P-FLA YARI YATUMIWEMO KURI TELEVIZIYO RWANDA

 

 

Ivan Heritier

Comments

comments




Leave a Reply

Your email address will not be published. Required fields are marked *