Perezida Kagame na Madamu batangije icyumweru cyo kwibuka ku nshuro ya 26 Jenoside yakorewe Abatutsi bacana urumuri rw’icyizere

Perezida wa Repubulika y’u Rwanda Paul Kagame na Madamu Jeannette Kagame batangije icyumweru cyo kwibuka ku nshuro ya 26 Jenoside yakorewe Abatutsi, bunamiye Abatutsi bashyinguye mu rwibutso rwa Jenoside rwa Kigali banacana urumuri rw’icyizere.

Kuri uyu wa Kabiri tariki ya 7 Mata 2020, Abanyarwanda n’inshuti z’u Rwanda batangiye iminsi 100 yo kwibuka ku nshuro ya 26 Jenoside yakorewe Abatutsi mu 1994.

Uyu muhango wabereye ku rwibutso rwa Kigali ku Gisozi, wabaye mu gihe gito kandi unitabirwa n’abantu bake mu rwego rwo gukomeza kubahiriza ingamba zashyizweho zo kwirinda no gukumira ikwirakwira ry’icyorezo cya Coronavirus.

Mu ijambo  Perezida Kagame yagejeje ku Banyarwanda ryo gutangiza icyumweru cy’icyunamo, yavuze ko ibihe u Rwanda rurimo bidasanzwe kubera icyorezo cya Coronavirus, bidashobora kubuza Abanyarwanda inshingano zo kwibuka abazize Jenoside.

Perezida Kagame yavuze ko uburyo bwo kwibuka uyu mwaka bugoye kuko budatuma abantu baba hamwe, ariko ko bigomba gukorwa.

Yagize ati “Uburyo bwo kwibuka uyu mwaka rero buragoye  ku barokotse n’imiryango yabo no ku gihugu cyose kuko tudashobora kuba hamwe ngo buri umwe ahumurize undi. Abanyarwanda tumenyereye kuba turi hamwe mu bihe nk’ibi, tugafatanya, tugahuza imbaraga zacu twese”.

Ati “Ibi tubikora mu rwego rw’igihugu no mu bindi bikorwa nko mu rugendo rwo kwibuka, ijoro ry’icyunamo n’ibiganiro. Ariko ibi bihe turimo bidasanzwe ntibishobora kutubuza inshingano yo kwibuka no guha icyubahiro abo twabuze no gukomeza abarokotse, hahindutse uburyo bw’ibikorwa gusa.”

Kuri iyi nshuro bitewe n’icyorezo cya Coronavirus, abaturage bazibukira mu ngo zabo babifashijwemo n’ibiganiro bizahita mu itangazamakuru: Radiyo, Televiziyo n’imbuga nkoranyambaga kandi hazakorwa ibishoboka kugira ngo ibikorwa byo kwibuka bigere no mu mahanga hakoreshejwe uburyo bw’iyakure.

Perezida wa IBUKA, Dusingizemungu Jean Pierre, na we yunamiye abazize Jenoside yakorewe Abatutsi.
Perezida w’Inteko Ishinga Amategeko Umutwe w’Abadepite, Hon. Mukabalisa Donatille.
Minisitiri w’Intebe, Dr Edouard Ngirente.

 

Tanga Igitekerezo ukoresheje Facebook

SHARE